গুৱাহাটী, 17 মে’: সাংবাদিক তথা মানৱ অধিকাৰ কৰ্মী পৰাগ কুমাৰ দাসৰ আজি 28 সংখ্যক মৃত্যু দিৱস । প্ৰতি বছৰৰ দৰে এইবাৰো আজিৰ দিনটোত ৰাজ্যৰ বিভিন্ন প্ৰান্তত আয়োজন কৰা হৈছে পৰাগ কুমাৰ দাসৰ স্মৃতিচাৰন অনুষ্ঠান ৷ গুৱাহাটী প্ৰেছ ক্লাৱতো পৰাগ কুমাৰ দাস সতীৰ্থ মঞ্চৰ উদ্যোগত প্ৰত্যেক বছৰৰ দৰে এইবাৰো আয়োজন কৰা হয় পৰাগ কুমাৰ দাস সাংবাদিকতা বঁটা প্ৰদান অনুষ্ঠানৰ ৷ প্ৰতিবছৰৰ দৰে এইবাৰো পৰাগ কুমাৰ দাসৰ মৃত্যু দিৱসতে পৰাগ কুমাৰ দাস সতীৰ্থ মঞ্চই 'পৰাগ কুমাৰ দাস সাংবাদিকতা বঁটা 2023' প্ৰদান কৰে প্ৰখ্যাত সাংবাদিক সংগীতা বৰুৱা পিছাৰটিক (Journalist Sangeeta Barooah Pisharoty) ৷
বুধবাৰে গুৱাহাটী প্ৰেছ ক্লাৱত আয়োজিত এক অনুষ্ঠানত পৰাগ কুমাৰ দাস সাংবাদিকতা বঁটা 2023 প্ৰদান কৰা হয় প্ৰখ্যাত সাংবাদিক সংগীতা বৰুৱা পিছাৰটিক ৷ এই বঁটা প্ৰদান কৰে বিশিষ্ট ঔপন্যাসিক, গল্পকাৰ অৰূপা পটংগীয়া কলিতাই ৷ এই বঁটাত আছে জাপি , ফুলৰ থোপা , স্মাৰক , সম্বৰ্ধনা পত্ৰ, অংগ বস্ত্ৰ আৰু 25 হাজাৰ টকা ৷
বঁটা গ্ৰহণ কৰি সংগীতা বৰুৱা পিছাৰটিয়ে কয় যে,পৰাগ দাসৰ পৰিয়ালে এতিয়াও ন্যায় পোৱা নাই ৷ বৰ্তমান সময়ত সংবাদ মাধ্যমলৈ যথেষ্ট প্ৰত্যাহ্বান আহিছে ৷ এই সময়ত পৰাগ কুমাৰ দাস সাংবাদিকতা বঁটা আৰু পৰাগ কুমাৰ দাসৰ প্ৰাসংগিকতা বাঢ়িছে ৷ স্বতন্ত্ৰ সংবাদ মাধ্যমক লৈ বহু নীতি-নিয়ম নিৰ্ধাৰণ কৰা হৈছে ৷ যাৰ বাবে বহু সময়ত সংবাদ পৰিৱেশন কৰাত অসুবিধা আহি পৰিছে বুলি মন্তব্য কৰে তেওঁ (Death anniversary of Parag Kumar Das) ৷
তেওঁ লগতে কয় যে, সংবাদ মাধ্যমৰ স্থান এতিয়া বহু তললৈ গৈছে ৷ গোদী মেডিয়াই সংবাদ মাধ্যমৰ সততা কাঢ়ি নিছে ৷ গোডী মেডিয়া এতিয়া অতি সহজ হৈ পৰিছে বুলি মন্তব্য কৰে তেওঁ ৷
এই অনুষ্ঠানত বিশিষ্ট লেখক দেৱব্ৰত দাসক বিশেষভাৱে সম্বৰ্ধনা জনোৱা হয় ৷ অনুষ্ঠানত পৰাগ কুমাৰ দাসৰ সাংবাদিকতাৰ প্ৰাসংগিকতা সন্দৰ্ভত স্মাৰক বক্তৃতা প্ৰদান কৰে জ্যেষ্ঠ অধিবক্তা শান্তনু বৰঠাকুৰে ৷ অনুষ্ঠানটোত উপস্থিত থাকে সাংসদ অজিত কুমাৰ ভূঞাৰ লগতে বহু কেইবাজনো বিশিষ্ট ব্যক্তি (Guwahati Press Club) ৷
