গুৱাহাটী, 17 জুলাই : ৰাজ্যজুৰি সমষ্টি পুনৰ নিৰ্ধাৰণৰ খচৰা প্ৰকাশ কৰাৰ পিচতেই অব্যাহত আছে প্ৰতিক্ৰিয়া ৷ এইবাৰ প্ৰস্তাৱিত সমষ্টি পুনৰ নিৰ্ধাৰণৰ খচৰাক লৈ সৰৱ হৈ থকা কংগ্ৰেছ সাংসদ গৌৰৱ গগৈ এইবাৰ সৰৱ হৈছে বট্টদ্ৰৱা সমষ্টিক লৈ ৷ কলিয়াবৰ লোকসভা সমষ্টিৰ সাংসদ তথা লোকসভাৰ বিৰোধী উপ-দলপতি গৌৰৱ গগৈয়ে সোমবাৰে দেশৰ প্ৰধানমন্ত্ৰী নৰেন্দ্ৰ মোদীলৈ এখন প্ৰত্ৰ প্ৰেৰণ কৰে ৷
এই পত্ৰযোগেৰে গৌৰৱ গগৈয়ে উল্লেখ কৰে যে, সমষ্টি পুনৰ নিৰ্ধাৰণৰ খচৰাত অসমৰ জাতীয় জীৱনৰ গুৰুজনা মহাপুৰুষ শ্ৰীমন্ত শংকৰদেৱৰ জন্মস্হান "বটদ্ৰৱা"ৰ নামত থকা বিধানসভা সমষ্টিটো বিলুপ্ত কৰা হৈছে ৷ বটদ্ৰৱা থানখন নগাঁও বিধানসভাৰ লগত সংলগ্ন কৰাৰ লগতে বটদ্ৰৱা সমষ্টিৰ বাকীখিনি অংশ ধিং সমষ্টিৰ অন্তৰ্গত কৰা হৈছে ৷ গুৰুজনাৰ স্মৃতি বিজড়িত অসমৰ এই পৱিত্ৰ "বটদ্ৰৱা" থান তথা সমগ্ৰ অঞ্চলটোৰ লগত "এক শৰণ নাম ধৰ্ম" দৰ্শনৰ গৌৰৱোজ্জ্বল ঐতিহ্য আৰু নৱ বৈষ্ণৱ আন্দোলনৰো ইতিহাস জড়িত হৈ আছে ৷ বটদ্ৰৱা থান অসমৰ জাতীয় জীৱনৰ আবেগ জড়িত হৈ আছে ৷
সেয়েহে সাংসদ গৌৰৱ গগৈয়ে এই পত্ৰৰ যোগে প্ৰধানমন্ত্ৰীক সমষ্টি পুনৰ নিৰ্ধাৰণৰ বিষয়টোৰ ওপৰত হস্তক্ষেপ দাবী কৰিছে ৷ পত্ৰখনত সমষ্টি পুনৰ নিৰ্ধাৰণত গুৰুজনাৰ স্মৃতি বিজড়িত নৱ বৈষ্ণৱ আন্দোলনৰ বাটকটীয়া মহাপুৰুষ গৰাকীৰ জন্মস্থান "বটদ্ৰৱা"ৰ নামত এটা বিধানসভা সমষ্টি অক্ষত ৰাখিবলৈ পদক্ষেপ গ্ৰহণ কৰে ৷ লগতে এই বিধানসভা সমষ্টিটোৰ ভৌগোলিক সীমাৰ ভিতৰত বটদ্ৰৱা থানকে ধৰি ইয়াৰ ঐতিহ্যবাহী সমগ্ৰ ঠাইখিনিকো অন্তৰ্ভুক্তিৰ ব্যৱস্থা গ্ৰহণ কৰিবলৈ আহ্বান জনাইছে ৷
অসমলৈ সমষ্টি পুনৰ নিৰ্ধাৰণৰ খচৰাৰ ৰাজহুৱা শুনানিৰ বাবে নিৰ্বাচন আয়োগৰ দল আগমনৰ প্ৰাকক্ষণত গৌৰৱ গগৈৰ এই পত্ৰক প্ৰধানমন্ত্ৰীগৰাকীয়ে কিমান গুৰুত্ব দিব সেয়া হ’ব মন কৰিবলগীয়া ৷
লগতে পঢ়ক: Price hike in Assam: শাক-পাচলিৰ পিচতে চাউল, তেলৰ আকাশলংঘী মূল্যবৃদ্ধি
