গুৱাহাটী, 13 জানুৱাৰী : আপুনিও 2023 ৰ নতুন নিৰিখ অনুসৰি সম্পত্তিৰ কৰ পৰিশোধ কৰা নাই নেকি ! তেন্তে শীঘ্ৰে সম্পত্তিৰ কৰ আদায় দিয়ক ৷ বিশেষকৈ গুৱাহাটীবাসীলৈ এই আহ্বান জনাইছে গুৱাহাটী পৌৰ নিগমৰ মেয়ৰ মৃগেন শৰণীয়াই ৷ নতুন নিৰিখি অনুসৰি যদিহে মহানগৰীত থকা সম্পত্তিৰ গৰাকীয়ে কৰ আদায় দিয়া নাই তেন্তে 31 মাৰ্চৰ ভিতৰত সম্পত্তিৰ কৰ আদায় দিবলৈ আহ্ৱান জনালে মেয়ৰগৰাকীয়ে ৷
শনিবাৰে সংবাদমেল সম্বোধন কৰি তেওঁ কয়, ‘‘মহানগৰীৰ 91 হাজাৰ সম্পত্তিৰ গৰাকীয়ে 2008 চনৰ নিৰিখ অনুসৰি অৰ্থাৎ পুৰণা নিৰিখ অনুসৰিহে সম্পত্তিৰ কৰ দি আছে ৷ তাৰ বিপৰীতে 1.50 লাখৰো অধিক সম্পত্তিৰ গৰাকীয়ে 2023 ৰ নতুন নিৰিখ অনুসৰি কৰ আদায় দি আছে ৷ 91 হাজাৰে নতুন নিৰিখ অনুসৰি সম্পত্তিৰ কৰ দিয়া নাই ৷ সেয়েহে তেওঁলোকক নতুন নিৰিখৰ মতে 31 মাৰ্চৰ ভিতৰত সম্পত্তি কৰ আদায় দিব লাগিব ৷ অন্যথা জব্দ হ’ব পাৰে সম্পত্তি বা বাতিল হ’ব পাৰে হ’ল্ডিং নম্বৰ ৷’’
ইফালে 91 হাজাৰ লোকলৈ মাঘ বিহুৰ উপলক্ষেও সম্পত্তি কৰ প্ৰদানত বিশেষ অফাৰৰ কথা ঘোষণা কৰে মেয়ৰগৰাকীয়ে ৷ তেওঁ কয়, ‘‘এই বৰ্ষত 50 শতাংশও যদি বাকী থকা সম্পত্তিৰ কৰ আদায় কৰে তেতিয়া হ’লে 2025 বৰ্ষত বাকী থকা 50 শতাংশ কৰ পৰিশোধ কৰিব পাৰিব ৷ যিহেতু মাঘ বিহু আৰু নতুন কৰৰ নিৰিখ অনুসৰি সহজতে দিবও নোৱাৰিবও পাৰে ৷’’
ইফালে স্বচ্ছ পৰ্যৱেক্ষণত গুৱাহাটীৰ স্থান অৱনমিত হোৱাৰ সন্দৰ্ভত তেওঁ কয়, ‘‘স্বচ্ছ সৰ্বেক্ষণ 2022ৰ ডাটাৰ ভিত্তিত দিয়া হৈছে ৷ গুৱাহাটীত ঘৰে ঘৰে জাবৰ পৃথক কৰিব লাগে । সেই ব্যৱস্থা আমাৰ হাতত নাই ৷ সেই ব্যৱস্থা আমি কৰি আছো ৷’’
লগতে পঢ়ক : মুখ্যমন্ত্ৰী হিমন্ত বিশ্বৰ 'লাখপতি বাইদেউ'ৱে অসমত ভেটিব ৰাহুল গান্ধীৰ ভাৰত জোড়ো ন্যায় যাত্ৰাক !
