গুৱাহাটী, 6 আগষ্ট: অসম-মিজোৰামৰ পাচত আজি অসম-মেঘালয়ৰ সীমা সমস্যা সন্দৰ্ভত এখন গুৰুত্বপূৰ্ণ বৈঠক অনুষ্ঠিত হয় । গুৱাহাটীৰ খানাপাৰাস্থিত অসম প্ৰশাসনীয় পদাধিকাৰী মহাবিদ্যালয়ৰ প্ৰেক্ষাগৃহত দুয়োখন ৰাজ্যৰ মুখ্যমন্ত্রী পৰ্যায়ত দুপৰীয়া 12 বজাৰ পৰা আৰম্ভ এই গুৰুত্বপূৰ্ণ বৈঠক আৰম্ভ হয় ৷
5 আগষ্টত অসম আৰু মিজোৰামৰ সীমা সমস্যা সমাধান আৰু সীমান্তত শান্তি স্থাপনৰ বাবে দুয়ো ৰাজ্যৰ প্ৰতিনিধিৰে আইজলত বৈঠক অনুষ্ঠিত হোৱাৰ পাচত আজি অসম আৰু মেঘালয়ৰ মুখ্যমন্ত্রী বৈঠকত মিলিত হৈছে । বৈঠকত অসমৰ মুখ্যমন্ত্ৰী ড৹ হিমন্ত বিশ্ব শৰ্মা আৰু মেঘালয়ৰ মুখ্যমন্ত্ৰী কনৰাড চাংমাৰ উপৰি দুয়োখন ৰাজ্যৰ কেইবাগৰাকী মন্ত্রী আৰু চৰকাৰী শীৰ্ষ বিষয়াই অংশ গ্ৰহণ কৰে ।
বৈঠকত মেঘালয়ৰ উপ-মুখ্যমন্ত্ৰীৰ লগতে অসমৰ মন্ত্রী চন্দ্ৰমোহন পাটোৱাৰী, অতুল বৰা আৰু ইউ জি ব্ৰহ্মই অংশ গ্ৰহণ কৰে ৷ এই বৈঠকৰ জড়িয়তে উত্তৰ-পূৰ্বাঞ্চলৰ দুই ৰাজ্যৰ মাজত চলি থকা দীৰ্ঘদিনীয়া সীমা সমস্যা সমাধানৰ বাট মুকলি হ’ব বুলি আশা কৰা হৈছে ৷
উল্লেখ্য যে, বৃহস্পতিবাৰে সীমা বিবাদ লৈ অসম আৰু মিজোৰামৰ মাজত অনুষ্ঠিত গুৰুত্বপূৰ্ণ বৈঠকত দুয়ো ৰাজ্যই নিজ নিজ সীমান্তত এতিয়াৰে পৰা কোনো ধৰণৰ নিৰাপত্তাৰক্ষী প্ৰেৰণ নকৰাৰ সিদ্ধান্ত গ্ৰহণ কৰে।
লগতে পঢ়ক: চাৰ্টাৰ্ড বিমানেৰে অসমৰ দুই মন্ত্ৰী মিজোৰামলৈ যাবলগীয়া হ'ল কিয় ?
