গুৱাহাটী,২৮ ছেপ্টেম্বৰ: ৰাজধানী চহৰ গুৱাহাটী মহানগৰীৰ উন্নয়নৰ ক্ষেত্রত গুৱাহাটী পৌৰ নিগমৰ ভূমিকা অপৰিসীম । কিন্তু কাৰ্যক্ষেত্রত সেই ভূমিকা পালনত চূড়ান্ত ৰূপে ব্যৰ্থ হৈছে গুৱাহাটী পৌৰ নিগম ।
ইফালে, গুৱাহাটী পৌৰ নিগমৰ বিৰুদ্ধে আছে দুৰ্নীতি আৰু অনিয়মৰ একাধিক অভিযোগ । লক্ষণীয় বিষয় যে গুৱাহাটী পৌৰ নিগমে বিভিন্ন আঁচনি গ্ৰহণ কৰে যদিও ৰূপায়নৰ বেলিকা কাৰ্যতঃ সফল হোৱা পৰিলক্ষিত নহয় ।
উল্লেখ্য যে মহানগৰীৰ দীৰ্ঘদিনীয়া কৃত্রিম বানপানীৰ সমস্যা সমাধানৰ বাবে প্ৰত্যেক বছৰে কোটি কোটি টকা ব্যয় কৰা হয় যদিও আজিলৈকে মহানগৰবাসী এই সমস্যাৰ পৰা মুক্ত হোৱা নাই । গুৱাহাটী পৌৰ নিগমে মহানগৰীক কৃত্রিম বানৰ পৰা মুক্ত কৰাৰ বাবে সময়ে সময়ে আঁচনি লৈছে যদিও সফল হ'ব পৰা নাই ।
ইফালে, বাৰিষাৰ পূৰ্বে নলা-নৰ্দমা খন্দা আৰু চাফা কৰাৰ নামত প্ৰত্যেক বছৰে পৌৰ নিগমে কোটি কোটি টকা ব্যয় কৰি আহিছে । কিন্তু এজাক বৰষুণ দিলেই সকলো নিঃচিহ্ন হৈ যায় । অৱশ্যে বহু সময়ত হোৱা দুৰ্নীতি আৰু অনিয়নমৰ বাবে আঁচনিসমূহৰ সুফল লাভৰ পৰা বঞ্চিত হ'বলগীয়া হৈছে মহানগৰবাসী ।
উল্লেখ্য যে শেহতীয়াকৈ পৌৰ নিগমত সংঘটিত হোৱা ২০ কোটি টকীয়া বোকা নিষ্কাশনৰ কেলেংকাৰীয়ে ৰাজ্যজুৰি তোলপাৰ লগাইছিল । তদন্ত বিচাৰি সেই সময়ৰ পৌৰ নিগমৰ আয়ুক্তগৰাকীয়ে মুখ্যমন্ত্ৰীৰ তদাৰকী শাখাত গোচৰ তৰিছিল ।
সেই গোচৰৰ ভিত্তিত কেইবাগৰাকী উচ্চপদস্থ বিষয়াক মুখ্যমন্ত্ৰীৰ তদাৰকী শাখাই গ্ৰেপ্তাৰ কৰিছিল । উল্লেখ্য যে পৌৰ নিগমৰ বোকা নিষ্কাশনৰ কেলেংকাৰী সন্দৰ্ভত ভাৰতৰ নিয়ন্ত্ৰক আৰু মহা হিচাপ পৰীক্ষকৰ (কেগ) শেহতীয়া প্ৰতিবেদনত কেলেংকাৰীৰ বহু দিশ উন্মোচিত হৈছে ।
কেগৰ তথ্য মতে পৌৰ নিগম কৰ্তৃপক্ষই ভৰলু নৈৰ বোকা নিষ্কাশনৰ বাবে ১.১৯ কোটি টকা পৰিশোধ কৰিছিল । কিন্তু ইয়াৰে ৪৫.৭৫ লাখ টকা প্ৰৱঞ্চনামূলক বুলি প্রতিবেদনখনত উল্লেখ কৰা হৈছে ।
লক্ষণীয় বিষয় যে এনে কামৰ ক্ষেত্রত প্রাকঃকলন প্রস্তুত কৰা, কাৰিকৰী অনুমোদন, প্রশাসনিক অনুমোদন আৰু প্ৰণালীবদ্ধ ৰেকৰ্ডিং কৰাৰ প্ৰয়োজন থাকে । কিন্তু ভৰলু নৈৰ বোকা নিষ্কাশন আৰু পৰিষ্কৰণৰ উদ্দেশ্যে পৌৰ নিগমে GMCৰ ডিভিজন ৪ আৰু ৫ৰ গেৰেজ শাখাৰ কাৰ্যবাহী অভিযন্তাক ১.১৯ কোটি টকা পৰিশোধ কৰিছিল ।
বোকা নিষ্কাশনৰ বাবে কোনো ঠিকাদাৰক নিযুক্ত নকৰাকৈ বিভাগীয়ভাৱে কাম-কাজ সম্পাদন কৰা হৈছিল । এইক্ষেত্ৰত কেগে হিচাপ পৰীক্ষা কৰাত অনিয়মসমূহ ধৰা পৰে । বিশেষকৈ উক্ত ধনৰাশিৰ ৪৩.১৬ লাখ টকা যন্ত্রপাতি আৰু ইন্ধনত ব্যয় কৰা দেখুওৱা হৈছিল ।
GMCৰ যন্ত্রপাতিৰ লকবুকত বোকা নিষ্কাশনৰ বাবে 21 খন ডাম্পাৰ, এখন এক্সকেভেটৰ আৰু চাৰিখন ফকলেন ব্যৱহাৰ কৰাটো উল্লেখ আছিল । পিচে 21খন ডাম্পাৰৰ ভিতৰত আঠখন ক্ৰমে মটৰ চাইকেল, তিনিচকীয়া বাহন, বাছ, সামগ্রী কঢ়িওৱা বাহন, ব্যক্তিগত গাড়ী আছিল ।
আনকি GMCৰ দুৰ্নীতিগ্রস্ত বিষয়াই ভৰলু নিষ্কাশনৰ ধন আত্মসাতৰ বাবে মাৰুতি ৱাগানাৰৰ পঞ্জীয়ন নম্বৰ এক্সভেটৰৰ বুলি দেখুৱাইছিল । যি কথা কেগৰ প্ৰতিবেদনত স্পষ্টভাৱে কোৱা হৈছে ।
তদুপৰি যন্ত্রপাতিৰ বাবে ভাড়া আৰু ইন্ধনত ব্যয় কৰা ৬.১ লাখ টকা প্ৰৱঞ্চনামূলক বুলিও প্রতিবেদনখনত কোৱা হৈছে । কেৱল এয়াই নহয় ৩৯.৬ লাখ টকাৰ ব্যয়ৰ সমৰ্থনত নাছিল কোনো নথি-পত্র । আকৌ গেৰেজ শাখাই ফকলেন ব্যৱহাৰৰ বাবে মেছাৰ্ছ এছ বি এণ্টাৰপ্ৰাইজৰ নামত এখন বিল দাখিল কৰি GMCৰ আয়ুক্তৰ পৰা চল্লিশ লাখ টকা বিচাৰিছিল ।
এনেদৰে ভৰলু নৈৰ বোকা নিষ্কাশনৰ নামত অবাধ লুণ্ঠন চলাইছিল GMCৰ কেইবাগৰাকীও দুর্নীতিপৰায়ণ বিষয়া-কৰ্মচাৰীয়ে । এই ধনৰাশি ক্রমে ২০১৭, ২০১৯ আৰু ২০২২ চনত অতি প্ৰৱঞ্চনাৰে সৰকোৱা হৈছিল বুলি প্রতিবেদনখনত উল্লেখ কৰা হৈছে ।
জি এম চিৰ তিনিটা পৃথক বিভাগৰ দ্বাৰা বোকা নিষ্কাশনৰ কামৰ কোনো প্রাকঃকলন প্রস্তুত নকৰাকৈ প্ৰশাসনিক অনুমোদন আৰু কাৰিকৰী অনুমোদন বিহীনভাৱে এ এফ আৰ উলংঘন কৰি কৰা হৈছিল ।
এনেদৰে প্ৰয়োজনীয় সমর্থিত নথি-পত্রবিহীন ভাৱে ৪৫.৭৫ লাখ টকা ভৰলুৰ বোকা নিষ্কাশনৰ নামত আত্মসাৎ কৰা হয় ।
লগতে পঢ়ক: Barak Valley: বৰাকত অসমীয়া ভাষাক অস্তিত্বহীন কৰি অৱশিষ্ট দুই শতাধিক শিক্ষকক বদলিৰ সিদ্ধান্ত
