গুৱাহাটী, ১ ছেপ্তেম্বৰ : বুধবাৰে দিনৰ ১১ বজাৰ পৰাই কাৰ্যকৰী হোৱাকৈ ৰাজ্য চৰকাৰে প্ৰায় শিথিল কৰি দিছে সকলো ক'ভিড সংক্ৰান্তীয় বাধা-নিষেধ । ৰাজ্যৰ স্বাস্থ্যমন্ত্ৰী কেশৱ মহন্তই বুধবাৰে জনতা ভৱনত এখন সংবাদমেলত ভাগ লৈ ঘোষণা কৰে এই নতুন SOP ।
কি কি থাকিব এই নতুন SOP ত ?
- ৰাজ্যজুৰি নিশা ৯ বজাৰ পৰা পুৱা ৫ বজালৈহে বলৱৎ থাকিব সান্ধ্য আইন ।
- নিশা ৮ বজালৈ খোলা ৰাখিব পাৰিব সকলো দোকান-পোহাৰ ।
- আন্তঃজিলা পৰিবহন মুকলি । এশ শতাংশ যাত্ৰীৰে চলিব যান-বাহন । যাত্ৰীয়ে মাস্ক পৰিধান কৰাটো বাধ্যতামূলক ।
- আৰম্ভ হ'ব নৈশ বাছ সেৱা ৷
- ৰাজহুৱা যান-বাহনত থিয় হৈ কোনো যাত্ৰী যাব নোৱাৰিব ।
- এই নিয়ম ভংগ কৰা যান-বাহনৰ পঞ্জীয়ন আৰু চালকৰ লাইচেঞ্চ বাতিল কৰা হ’ব ।
- চিনেমা হল পূৰ্বৰ দৰেই বন্ধ থাকিব । ভ্ৰাম্যমাণ থিয়েটাৰৰ আখৰা শিবিৰ চলি থাকিব পাৰিব ।
- এপালি প্ৰতিষেধক লোৱা চৰকাৰী কৰ্মচাৰীও আহিব লাগিব কাৰ্যালয়লৈ ।
- এপালিও প্ৰতিষেধক নোলোৱা চৰকাৰী কৰ্মচাৰীয়ে তিনিদিনৰ ভিতৰত প্ৰতিষেধক ল'ব লাগিব ।
- আন্তঃজিলা যাতায়াত কৰিবলৈ কমেও এপালি প্ৰতিষেধক লোৱাটো বাধ্যতামূলক ।
- বাইক আদিত যাত্ৰা কৰিব পাৰিব দুজনে ।
- সোমবাৰৰ (৬ ছেপ্তেম্বৰ) পৰা পূৰ্ণোদ্যমে চলিব স্নাতকোত্তৰ, স্নাতক, উচ্চতৰ মাধ্যমিকৰ চূড়ান্ত বৰ্ষ আৰু সিবিলাকৰ সম পৰ্যায়ৰ পাঠদান ।
- একোটা শ্ৰেণীকোঠাত সৰ্বাধিক ৩০ গৰাকী শিক্ষাৰ্থীয়ে পাঠ গ্ৰহণ কৰিব পাৰিব ।
- শিক্ষাৰ্থী, শিক্ষক-কৰ্মচাৰী সকলোৱে কমেও এপালি প্ৰতিষেধক লোৱা হ’ব লাগিব ।
- দুয়োপালি প্ৰতিষেধক লোৱা শিক্ষাৰ্থীহে হোষ্টেলত থাকিব পাৰিব ।
- ৰাজহুৱা সভা-সমিতিত কমেও এপালি প্ৰতিষেধক লোৱা সৰ্বাধিক ৫০ গৰাকী লোক উপস্থিত থাকিব পাৰিব । ইয়াৰ বাবে কোনো অনুমতিৰ প্ৰয়োজন নহ'ব । কেৱল স্থানীয় থানাত আগতীয়াকৈ অৱগত কৰিব লাগিব ।
- জিলা উপায়ুক্তৰ অনুমতি লৈ সভা-সমিতিত দুশ জনলৈকে লোকে ভাগ লব পাৰিব ।
- বিবাহ, শেষকৃত্য বা যিকোনো মাংগলিক অনুষ্ঠানত সৰ্বাধিক ৫০ গৰাকী লোক উপস্থিত থাকিব পাৰিব ।
- ধৰ্মীয় স্থানসমূহত ঘণ্টাত ৪০ গৰাকী দৰ্শনাৰ্থীক প্ৰৱেশৰ অনুমতি দিয়া হ’ব ।
- সাপ্তাহিক বজাৰসমূহ ছয় ঘণ্টাৰ বাবে খোলা থাকিব ।
- ৰে’ল ষ্টেচন আৰু বিমান বন্দৰত দুয়ো পালি প্ৰতিষেধক লোৱা যাত্ৰীয়ে ক'ভিড পৰীক্ষা নকৰিলেও হ’ব ।
- কিন্তু এপালি প্ৰতিষেধক লোৱাসকলে পৰীক্ষা কৰিব লাগিব । তাৰ বাবে ২৫০ টকা আদায় দিব লাগিব ।
লগতে পঢ়ক : ক’ভিড ব্যৱস্থাপনাত হোৱা খৰচৰ অনাদায় ধন শীঘ্ৰেই পৰিশোধৰ ব্যৱস্থা ৰাজ্য চৰকাৰৰ
