অসমত আঞ্চলিকতাবাদ-জাতীয়তাবাদৰ ভেটি সবল কৰিব AJYCPয়ে!

ৰাজহুৱা সম্পত্তি বিক্ৰী আৰু ব্যক্তিগতকৰণ কোনো কাৰণতে মানি নলয় অসম জাতীয়তাবাদী যুৱ ছাত্ৰ পৰিষদে। পৰিষদে নদী বান্ধ আৰু নাগৰিকত্ব আইনৰ বিৰোধিতা কৰি আছে আৰু কৰি থাকিব ৷ অসমত ইনাৰ লাইন পাৰ্মিট প্ৰৱৰ্তন কৰিবই লাগিব ৷ ইনাৰলাইন পাৰ্মিটৰ বাবে দিল্লীত গৈ আন্দোলন কাৰ্যসূচী গ্ৰহণ কৰাৰ হুংকাৰ অসম জাতীয়তাবাদী যুৱ ছাত্ৰ পৰিষদৰ ৷

গুৱাাহাটী, 4 জানুৱাৰী: শেহতীয়াকৈ কেন্দ্ৰ তথা ৰাজ্য চৰকাৰে অসমৰ সম্পদ তথা বিভিন্ন প্ৰতিষ্ঠান সমূহক ব্যক্তিগতকৰণ কৰা প্ৰসংগক লৈ সোমবাৰে সংবাদমেলযোগে সৰৱ হ’ল অসম জাতীয়তাবাদী যুৱ ছাত্ৰ পৰিষদ ৷ সংবাদমেলযোগে পৰিষদৰ সম্পাদক পলাশ চাংমাইৰ দাবী চৰকাৰৰ এনে নীতি কেতিয়াও মানি লোৱা নহ’ব ৷ ৰাজ্যৰ কোনোধৰণৰ ৰাজহুৱা খণ্ডৰ প্ৰতিষ্ঠানক ব্যক্তিগত খণ্ডৰ হাতত অৰ্পণ কৰিবলৈ দিয়া নহ’ব চৰকাৰক ৷ ইয়াৰ বাবে ৯ জানুৱাৰীত জিলা সমিতিসমূহে গণ অৱস্থান ধৰ্মঘট কাৰ্যসূচী গ্ৰহণ কৰিব ৷ সমান্তৰালভাৱে ২০ জানুৱাৰীত জিলা,মহকুমা সমিতিসমূহত কা বিৰোধী প্ৰতিবাদত জোঁৰ সমদল কাৰ্যসূচীও গ্ৰহণ কৰিব ৷ ২৭ জানুৱাৰীত ৫০০খন পথ সভা আয়োজন কৰিব আঞ্চলিক আৰু শাখা সমিতিসমূহে।

আনহাতে নতুন আঞ্চলিক ৰাজনৈতিক দল সন্দৰ্ভতো প্ৰতিক্ৰিয়া প্ৰকাশ পলাশ চাংমাইৰ ৷ চাংমাইৰ মন্তব্য-“অসমত আঞ্চলিকতাবাদ আৰু জাতীয়তাবাদী ভেটি সৱল কৰিব AJYCPয়ে ৷ অৰাজনৈতিক চৰিত্ৰ অক্ষুন্ন ৰাখি আঞ্চলিক দলক সহযোগ কৰিব যুৱ-ছাত্ৰ পৰিষদে।”

লগতে পঢ়ক: ৰাষ্ট্ৰসংঘৰ সুৰক্ষা পৰিষদত উৰিল ভাৰতৰ ৰাষ্ট্ৰীয় পতাকা