গুৱাহাটী, ২৮ অক্টোবৰ : আৰক্ষীৰ প্ৰৱল বাধা আৰু প্ৰত্যাহ্বানৰ মাজেৰে বৃহস্পতিবাৰে গুৱাহাটী মহানগৰীত এক প্ৰতিবাদী কাৰ্যসূচী ৰূপায়ণ কৰে অসম জাতীয় পৰিষদে । অসম জাতীয় পৰিষদৰ কামৰূপ জিলা আৰু কামৰূপ মহানগৰ সমিতিয়ে মূল্যবৃদ্ধিৰ বিৰুদ্ধে এই প্ৰতিবাদী কাৰ্যসূচী ৰূপায়ণ কৰে । অত্যাৱশ্যকীয় সামগ্ৰীৰ আকাশলংঘী মূল্যবৃদ্ধি আৰু পে’ট্ৰল-ডিজেলৰ মূল্যবৃদ্ধিৰ বিৰুদ্ধে এই প্ৰতিবাদী কাৰ্যসূচী হাতত লোৱা হয় ।
অসম জাতীয় পৰিষদে গুৱাহাটী ক্লাৱৰ টি চি স্কুল পইন্টৰ পৰা এই প্ৰতিবাদী কাৰ্যসূচী ৰূপায়ণ কৰি ৰাজভৱনলৈ যোৱাৰ কথা আছিল যদিও আৰক্ষীৰ বেৰিকেডৰ বাবে প্ৰতিবাদকাৰীসকলৰ বাবে সেয়া সম্ভৱ হৈ নুঠিল । আৰক্ষীয়ে প্ৰতিবাদকাৰীসকলক বাধা দিয়াৰ ফলত সৃষ্টি হোৱা হতাহতিত ফলত কেইবাজনো প্ৰতিবাদকাৰী আহত হয় ।
প্ৰতিবাদৰ পিছত দলৰ সভাপতি লুৰীণজ্যোতি গগৈ, কাৰ্যকৰী সভাপতি পবীন্দ্ৰ ডেকা আৰু সাধাৰণ সম্পাদক জগদীশ ভূঞা সমন্বিতে দলটোৰ এটা প্ৰতিনিধি দলে ৰাজভৱনত ৰাজ্যপাল জগদীশ মুখীক সাক্ষাৎ কৰি এখন স্মাৰকপত্ৰ প্ৰদান কৰে ।
লগতে পঢ়ক : গুৱাহাটীৰ এটা অঞ্চলক কৰা হ'ল কণ্টেইনমেণ্ট জ'ন
