গুৱাহাটী, 17 জুন : পুনৰ ফাট মেলিলে গান্ধী মণ্ডপৰ সুউচ্চ ত্ৰিৰংগাত ৷ এবাৰ দুবাৰ নহয়, আঠটা মাহ নৌহওতেই ছয়বাৰকৈ ফাটিল ২ অক্টোবৰত গান্ধী জয়ন্তীৰ লগত সংগতি ৰাখি গান্ধী মণ্ডপত স্থাপন কৰা দেশৰ ভিতৰতে সুউচ্চত স্থাপন কৰা তৃতীয় বৃহৎ পতাকাখন ৷ ব্ৰহ্মপুত্ৰ নৈ কাষৰীয়া হোৱা হেতুকে প্ৰৱল বতাহৰ কোবৰ বাবেই ফাট মেলাৰ সন্দেহ ৷ গুৱাহাটী স্মাৰ্ট চিটি প্ৰকল্পৰ অধীনত শৰণীয়া পাহাৰৰ গান্ধী মণ্ডপত ২.৯২ কোটি টকা ব্যয় সাপেক্ষে পূৰ্বে ১২০ ফুট দৈৰ্ঘ্য আৰু ৮০ ফুট প্ৰস্থৰ পতাকাখন ফাট মেলাত ইয়াৰ দৈৰ্ঘ্য আৰু প্ৰস্থ হ্ৰাস কৰি কৰা হৈছিল ৭২ আৰু ৪৮ ফুট ৷ যদিও পুনৰ ফাট মেলে পতাকাখনত ৷
পতাকাখনৰ স্থাপনৰ ক্ষেত্ৰত ঠিকাদাৰী প্ৰতিষ্ঠান এম এছ বাজাজ ইলেক্ট্ৰনিকছ লিমিটেডে পূৰ্বৰে পৰা লুণ্ঠন চলোৱাৰ অভিযোগ উত্থাপন হৈছে যদিও এইবাৰ প্ৰতিষ্ঠানটোৱে বেলজিয়ামত প্ৰস্তুত কৰিছে পতাকাখন । লগতে এইবাৰ পেৰাছুটৰ কাপোৰেৰে প্ৰস্তুত কৰিবলৈ যো-জা চলোৱা হৈছে পতাকাখনৰ । সেইয়া যিয়ে নহওক এনেদৰে সঘনাই পতাকাখন ফাট মেলাত চিন্তিত হৈ পৰিছে সচেতন মহল ৷
