হাইলাকান্দি, 12 জুলাই : কৰ'ণা সন্ত্ৰাসৰ মাজতে দেওবাৰে হাইলাকান্দি জিলাত এগৰাকী মহিলাই আত্মহত্যা কৰাৰ খবৰ আহি পৰিছে ৷ জিলাখনৰ নিশ্চিতপুৰ গাঁৱত সংঘটিত হৈছে এই ঘটনা ৷
জানিব পৰা মতে, গাঁওখনৰ আবুল হুছেইন আৰু তেঁওৰ পত্নী চাৰবীন তাজ আৰু 7 বছৰীয়া কণমানি পুত্ৰকলৈ দীৰ্ঘ দিনৰ পৰা বাংগালুৰুত বসবাস কৰি আছিল । কিন্তু লক্ ডাউনৰ ফলত কৰ্মহীন হৈ পৰাৰ বাবে 24 জুনত নিজ ঘৰলৈ উভতি আহিছিল পৰিয়ালটো ৷ বহিঃৰাজ্যৰ পৰা পৰিয়ালটি উভতি অহাৰ পিচত জিলা প্ৰশাসনে গাঁৱৰে এখন বিদ্যালয়ত কোৱাৰেন্টাইনৰ ব্যৱস্থা কৰিছিল আটাইকে ৷
উল্লেখযোগ্য যে, 28 জুনত পৰিয়ালটিৰ স্বাৱ সংগ্ৰহ কৰি পৰীক্ষাৰ বাবে নিয়া হৈছিল যদিও স্বামী আবুল হুছেইনৰ ৰিপ'ৰ্ট নিগেটিভ আহিছিল আৰু মাতৃ আৰু পুত্ৰৰ ৰিপ'ৰ্ট আহিবলৈ বাকী আছিল ৷
তথ্য অনুসৰি, পৰীক্ষাৰ ৰিপ'ৰ্ট নহাৰ বাবে হতাশাত ভুগিছিল মহিলা গৰাকী ৷ আনকি, বাংগালুৰুৰ 4 গৰাকী প্ৰতিবেশীৰ কৰ'ণাত মৃত্যু হোৱাৰ খবৰে বিচলিত কৰিছিল মহিলা গৰাকীক ৷ অবশেষত হতাশাৰ পৰা পৰিত্ৰাণ পাবলৈ দেওবাৰে পুৱা 4 বজাত বিদ্যালয়ৰ শৌচাগাৰত চিপ লৈ আত্মহত্যা কৰিছে বুলি স্বামী আবুল হুছেইনে জানিব দিয়ে ৷
আনহাতে, ঘটনাৰ পিচতে ঘটনাস্থলীত জিলা প্ৰশাসন আৰু আৰক্ষীৰ লোকে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে হাইলাকান্দিৰ এচ কে ৰায় অসামৰিক চিকিৎসালয়লৈ প্ৰেৰণ কৰা হৈছে বুলি জানিব পৰা গৈছে ৷
লগতে পঢ়ক : ২৪ ঘণ্টাত গুৱাহাটীত কৰ'ণাত আক্ৰান্ত হৈছে ৪১০ গৰাকী ব্যক্তি
