গোলাঘাট, 2 ডিচেম্বৰঃ মৃত্যুদূতলৈ পৰিণত হৈছে গোলাঘাট জিলাৰ 39 নং ৰাষ্ট্ৰীয় ঘাইপথ ৷ দৈনন্দিন ৰাষ্ট্ৰীয় ঘাইপথটোত সংঘটিত হৈ আহিছে দুৰ্ঘটনা ৷ সোমবাৰে সংঘটিত হোৱা দুটাকৈ পৃথক পৃথক দুৰ্ঘটনাত দুজনকৈ লোক নিহত হোৱাৰ লগতে আহত হয় এজন লোক ৷
লগতে পঢ়কঃ অজগৰ ধৰি নেগুৰেৰে কাণ খজুৱালে এইজন লোকে
ঘটনা অনুসৰি, প্ৰথমটো দুৰ্ঘটনা সংঘটিত হয়, কানাইঘাত অঞ্চলত ৷ AS 03 N 1568 পঞ্জীয়নভুক্ত এখন বাইক আৰু AS 05 C 8771 পঞ্জীয়নভুক্ত এখন ডাম্পাৰৰ মুখামুখি সংঘৰ্ষত থিতাতে নিহত হয় দিলিপ ভূঞা নামৰ এজন লোক ৷ দুৰ্ঘটনাটোত গুৰুতৰভাৱে আহত হয় সুৰজ তাঁতী নামৰ আন এজন লোক ৷ ইতিমধ্যে আহত লোকজনক উন্নত চিকিৎসাৰ বাবে স্থানীয় চিকিৎসালয়ত ভৰ্তি কৰোৱা হৈছে ৷ আনটো দুৰ্ঘটনা সংঘটিত হয়, মৰঙীত ৷ NL 08 H 6856 পঞ্জীয়নভুক্ত এখন ডাম্পাৰৰ খুন্দাত থিতাতে নিহত হয় অনিল বৰদলৈ নামৰ এজন লোক ৷
লগতে পঢ়কঃ সংসদত উত্থাপন হায়দৰাবাদৰ দলবদ্ধ ধৰ্ষণ কাণ্ড
উল্লেখ্য যে, ৰাষ্ট্ৰীয় ঘাইপথটোত দ্ৰুতবেগী ডাম্পাৰৰ বাবেই এইদৰে দুৰ্ঘটনা সংঘটিত হৈ অহাৰ লগতে প্ৰাণ হেৰুৱাবলগীয়া হৈছে নিৰীহ লোকে ৷ এইক্ষেত্ৰত ৰাষ্ট্ৰীয় ঘাইপথ প্ৰাধিকৰণৰ লগতে স্থানীয় আৰক্ষীয়ে কোনোধৰণৰ গুৰুত্ব প্ৰদান নকৰাৰ বাবেই দিনক দিনে বৃদ্ধি পাই আহিছে দুৰ্ঘটনাৰ ঘটনা ৷
