গোলাঘাট, 20 এপ্ৰিল : আজিৰ দিনটোতে দেশ স্বজাতিৰ বাবে চন্দনগিৰি পৰ্বতৰ পৰা জপিয়াই আত্মজাহ দিছিল অসম বুৰঞ্জীৰ পৃষ্ঠা দখল কৰা বীৰ নাৰী সতী সাধনীয়ে। আজিৰ পৱিত্ৰ দিনটো সতী সাধনী দিৱস হিচাপে বিভিন্ন কাৰ্য্যসূচীৰে পালন কৰি আহিছে ৰাজ্যবাসীয়ে । কিন্তু এইবাৰৰ দৃশ্যপট কিছু পৃথক । কৰ'ণা ভাইৰাছ সংক্ৰমণৰ বাবে স্তব্ধ হৈ পৰিছে গতিশীল সমাজ জীৱন। তথাপিও নিজৰ জাতিৰ বাবে আত্মবলিদান দিয়া সতী সাধনীৰ মৃত্যু তিথিত মহিয়ষী গৰাকীক স্মৰণ কৰিবলৈ নাপাহৰিলে অসমবাসীয়ে ।
গোলাঘাটত সদৌ চুতীয়া জাতি সন্মিলন,চুতীয়া ছাত্ৰ সন্থা,জনগোষ্ঠীয় সম্বন্বয় ৰক্ষক সমিতিৰ কেইজনমান সদস্যই গোলাঘাট সতী সাধনী কলাক্ষেত্ৰত চৰকাৰৰ নিৰ্দেশাৱলী অনুসৰি পতাকা উত্তোলন,স্মৃতি তৰ্পণ আৰু বন্তি প্ৰজ্বলনৰে পালন কৰিলে সতী সাধনী দিৱস। আজিৰ দিনটোতেই গোলাঘাটৰ লগতে অসমৰ বিভিন্ন প্ৰান্তৰ নতুন কৈ নিৰ্মিত কৰা সতী সাধনী প্ৰতিমূৰ্তি উন্মোচন কৰাৰ কথা আছিল যদিও বৰ্তমান পৰিস্থিতিৰ বাবে স্থগিত ৰখা হয় সেই কাৰ্যসূচী। উল্লেখ্য যে, বীৰাংগণা সতী সাধনীৰ জীৱনীক লৈ হিন্দী আৰু অসমীয়া দুয়োটা ভাষাতে চলচ্চিত্ৰ নিৰ্মাণৰ কাম আৰম্ভ কৰা হৈছে । বলিউডৰ চলচ্চিত্ৰ পৰিচালক বিশ্বজিৎ বৰাৰ পৰিচালনাত এই ব্যয়বহুল চলচ্চিত্ৰ নিৰ্মাণৰ কাম হাতত লোৱা হৈছে।
লগতে পঢ়ক :28 দিনৰ অন্তত মঙলবাৰৰ পৰা পৰা জনতা ভৱনত পুনৰ আৰম্ভ হ'ব কাম কাজ
