মৰাণ, 1 মাৰ্চ : মৰাণৰ মাহমৰা ৰাজহ চক্ৰৰ অন্তৰ্গত ২ নং সৰুপথাৰত অৱস্থিত ঐতিহাসিক কালি মন্দিৰৰ ভূমিত চলিছে ভূ-মাফিয়াৰ অতপালি (Temple land occupied by Land mafia at Moran) ৷ তিনিচুকীয়া জিলাৰ টেঙাখাট আলিমূৰ নিৱাসী লক্ষ্মণ চাহু নামৰ এজন লোকে বেদখল কৰাৰ লগতে জালিয়াতিৰে বিক্ৰী কৰাৰ ষড়যন্ত্ৰত লিপ্ত হোৱা বুলি অভিযোগ উত্থাপন কৰিছে মন্দিৰ পৰিচালনা সমিতিয়ে ৷
উল্লেখ্য যে, ৰাজহ মন্ত্ৰী যোগেন মহনৰ গৃহ নগৰ মৰাণতে এই ভূ-মাফিয়াৰ কাণ্ড অব্যাহত আছে (Land mafia in revenue minister's home town) ৷ সোমবাৰে আবেলি মন্দিৰৰ চৌহদত এখন সংবাদমেল সম্বোধন কৰি মন্দিৰ পৰিচালনা সমিতিৰ সভাপতি নিৰেশ্বৰ বকলীয়াল, উপ-সভাপতি সূৰ্য বৰগোহাঁই আৰু সম্পাদক জান শইকীয়াই ভূমি জালিয়াতিত লিপ্ত অসাধু ব্যক্তিজনৰ বিৰুদ্ধে আইনগত শাস্তি প্ৰদানৰ দাবী জনায় ।
উল্লেখ্য যে, চৰাইদেউ জিলাৰ মাহমৰা ৰাজহ চক্ৰৰ অন্তৰ্গত 2 নং সৰুপথাৰ (অভয়পুৰ)ত বিগত প্ৰায় 100 বছৰ পূৰ্বে কালি মন্দিৰ নিৰ্মাণৰ বাবে স্থানীয় এজন লোকে দান সূত্ৰে আগবঢ়াইছিল এডোখৰ ভূমি । ইয়াৰপাছতে 1 কঠা 9 লেচা ভূমি কালি মন্দিৰ (থান)ৰ নামত আবন্টন দিছিল চৰকাৰে ৷
পিছে টেঙাখাটৰ লক্ষ্মণ চাহু নামৰ লোকজনে ভূমিখণ্ড বেদখল কৰি আন এজন লোকক বিক্ৰী কৰাৰ অভিযোগ তোলে মন্দিৰ পৰিচালনা সমিতিয়ে । ইফালে লক্ষ্মণ চাহুৱে মৰাণৰ 2 নং সৰুপথাৰত থকা শহুৰেকৰ ভূমি জালিয়াতি কৰি বিক্ৰী কৰাৰো অভিযোগ উঠিছে ।
লগতে একেডোখৰ ভূমি কেইবা গৰাকীও লোকক বিক্ৰী কৰি বিয়াগোম জালিয়াতিৰ আশ্ৰয় লোৱা লক্ষ্মণ চাহুক শীঘ্ৰে কঠোৰ আইনগত শাস্তি প্ৰদানৰ দাবী উত্থাপন কৰে মন্দিৰ পৰিচালনা সমিতিয়ে । আনহাতে মন্দিৰটোৰ সমীপতে থকা আন এডোখৰ শহুৰেকৰ ভূমি ধন আদায় লোৱাৰ পাছতো দীৰ্ঘদিনে হস্তান্তৰ কৰা নাই বুলি কেইবাগৰাকীও ভুক্তভোগীয়ে আজিৰ সংবাদমেলত আন এক গুৰুতৰ অভিযোগ তোলে ৷
লগতে পঢ়ক : Maha Shivratri at Maha Mrituynjay Mandir: মহা মৃত্যুঞ্জয় মন্দিৰত পূজা আগবঢ়ালে ৰাজ্যপালে
