ডিব্ৰুগড়, 31 ডিচেম্বৰ: দিহিং পাটকাই ৰাষ্ট্ৰীয় উদ্যানত পুনৰ বন ধ্বংসযজ্ঞ । চোৰাং চিকাৰীয়ে কাটি তহিলং কৰিলে ৩০ জোপাকৈ হোলোং গছ (Dehing Patkai National Park) । নাহৰকটীয়া জয়পুৰৰ দিহিং পাটকাই ৰাষ্ট্ৰীয় উদ্যানৰ বন হুগৰি পথাৰ আৰু ট্ৰাক নলা এলেকাত প্ৰায় ৩০ জোপাকৈ প্ৰকাণ্ড প্ৰকাণ্ড হোলোং গছ কাটি তহিলং কৰিলে বনদস্যুয়ে । চুবুৰীয়া ৰাজ্য অৰুণাচলৰ পৰা প্ৰায়ে বনদস্যুৰ দলে ৰাষ্ট্ৰীয় উদ্যানখনত প্ৰৱেশ কৰি বন ধ্বংসযজ্ঞ চলাই গৈছে (Poachers cut down trees from DPNP) । শেহতীয়াকৈ ৰাষ্ট্ৰীয় উদ্যানখনৰ হোলোং গছ কটা এটা ভিডিঅ'ই তোলপাৰ লগাইছে বন বিভাগত ।
উল্লেখ্য যে, নৱবৰ্ষৰ প্ৰাকক্ষণত নাহৰকটীয়াৰ জয়পুৰৰ দিহিং পাটকাই ৰাষ্ট্ৰীয় উদ্যানত সংঘটিত হৈছিল গুলীয়াগুলীৰ ঘটনা । বন বিভাগ আৰু চোৰাং চিকাৰীৰ মাজত ৰাষ্ট্ৰীয় উদ্যানখনত সংঘটিত হৈছিল প্ৰচণ্ড গুলীয়াগুলী (Firing in Dehing Patkai National Park) । দিহিং পাটকাই ৰাষ্ট্ৰীয় উদ্যানৰ অসম-অৰুণাচল সীমান্তৰ দুৰ্গম পাহাৰীয়া অঞ্চল ট্ৰাকনলাত বৃহস্পতিবাৰে নিশা সংঘটিত হৈছিল এই ঘটনা ।
অসম-অৰুণাচলৰ সীমান্তত থকা জয়পুৰ বন বিভাগৰ অধীনৰ শুকানজুৰি খণ্ড বন কাৰ্যালয়ৰ সাতজনীয়া বনকৰ্মীৰ এটা দলে বৃহস্পতিবাৰে নিশা নিয়মীয়া টহল দিবলৈ ৰাষ্ট্ৰীয় উদ্যানখনৰ বাসৱনলাৰ দিশে আগবাঢ়ি গৈছিল । তেনে সময়তে বনকৰ্মীৰ দল অহাৰ উমান পাই উক্ত স্থানত বনকৰ্মীৰ দলটোলৈ লক্ষ্য কৰি চোৰাং চিকাৰীৰ দলটোৱে ধাৰাসাৰ গুলীবৰ্ষণ কৰে (Forest guard firing with poachers) । প্ৰত্যুত্তৰত বনকৰ্মীৰ দলটোৱেও গুলীবৰ্ষণ কৰে । প্ৰায় আধা ঘণ্টা ধৰি চলা দুয়োপক্ষৰ গুলীচালনাৰ পিছত নিশাৰ অন্ধকাৰৰ সুযোগ লৈ চোৰাং চিকাৰীৰ দলটো পলাই যাবলৈ সক্ষম হয় । অৱশ্যে এই গুলীচালনাৰ ঘটনাত বন বিভাগৰ কোনো লোক হতাহত হোৱা নাই ।
ইফালে পুৱতি নিশা 4 বজালৈকে চোৰাং চিকাৰীৰ সন্ধানত অভিযান চলায় বন বিভাগৰ দলটোৱে । উল্লেখ্য যে, চলিত বৰ্ষৰ ফেব্ৰুৱাৰী মাহতো অনুৰূপ ধৰণেৰে গুলীচালনাৰ ঘটনা সংঘটিত হৈছিল আৰু এয়া ৰাষ্ট্ৰীয় উদ্যানখনত দ্বিতীয়টো গুলীচালনাৰ ঘটনা । মন কৰিবলগীয়া যে, চুবুৰীয়া ৰাজ্য অৰুণাচল প্ৰদেশৰ পৰা প্ৰায়ে চোৰাং চিকাৰী দলে ৰাষ্ট্ৰীয় উদ্যানখনত প্ৰৱেশ কৰি মূল্যৱান গছ আদি কটাৰ লগতে জীৱ-জন্তু আদি চিকাৰ কৰি বন ধ্বংসযজ্ঞ চলাই গৈছে ।
উল্লেখ্য, নতুনকৈ ঘোষণা হোৱা দিহিং পাটকাই ৰাষ্ট্ৰীয় উদ্যানত পূৰ্বৰ দৰেই চলি আছে চোৰাং কাঠ ব্যৱসায়ীৰ দপদপনি । বিগত বছৰতো জয়পুৰ বন সংমণ্ডলৰ অধীনত থকা বনকৰ্মী আৰু অৰুণাচলী চোৰাং কাঠ মাফিয়াৰ মাজত প্ৰচণ্ড গুলীয়াগুলীৰ ঘটনা সংঘটিত হৈছিল । উক্ত ঘটনাত থিতাতে নিহত হৈছিল চোৰাং কাঠৰ বেপাৰীয়ে কুণ্ডা টানিবলৈ ব্যৱহাৰ কৰা এজনী হাতী । উক্ত ঘটনা সংঘটিত হোৱাৰ মাত্ৰ কেইটামান দিন পূৰ্বে বনমন্ত্ৰী আৰু ৰাজ্য চৰকাৰে দিহিং পাটকাই অভয়াৰণ্যক ৰাষ্ট্ৰীয় উদ্যান হিচাপে ঘোষণা কৰিছিল ৷
লগতে পঢ়ক: Dehing Patkai National Park : দিহিং পাটকাই ৰাষ্ট্ৰীয় উদ্যানত বনকৰ্মী আৰু চোৰাং চিকাৰীৰ গুলীয়াগুলী
