মৰাণ, 11 মে' : আফ্ৰিকান ছোৱাইন ফিভাৰত আক্ৰান্ত হৈ মৃত্যু হোৱা গাহৰি পালক সকলক সহায় কৰিবলৈ আগবাঢ়ি আহিছে বিধায়ক চক্ৰ গগৈ ৷ গাহৰিৰ মৃত্যুৱে দৰিদ্ৰ কৃষক সকলক হতাশ কৰাৰ পাছতে আজি সমষ্টিৰ বিভিন্ন ঠাইত গাহৰি পালকৰ ঘৰলৈ গৈ সাহাৰ্য্য প্ৰদানৰ আশ্বাস দিয়ে মৰাণৰ বিধায়ক চক্ৰ গগৈয়ে ৷
উল্লেখযোগ্য যে, অসমৰ বহু কেইখন জিলাৰ লগতে ডিব্ৰুগড় জিলাৰ মৰাণ বিধানসভা সমষ্টিত আফ্ৰিকান ছোৱাইন ফিভাৰত আক্ৰান্ত হৈ নিয়মিতভাৱে পশুধনৰ মৃত্যু হোৱাত পশুপালক তথা কৃষক সকলৰ মাজত হাহাকাৰৰ পৰিবেশ সৃষ্টি হৈছে ।
কিন্তু সোমবাৰে দৰিদ্ৰ কৃষক সকলৰ ঘৰে-ঘৰে গৈ লক্ ডাউন আঁতৰিলেই সহায় কৰাৰ প্ৰতিশ্ৰুতি প্ৰদান কৰে বিধায়ক গৰাকীয়ে ৷ বিধায়ক গৰাকীয়ে জানিবলৈ দিয়া অনুসৰি, ইতিমধ্যে বিভাগীয় মন্ত্ৰী অতুল বৰাৰ লগত এই সম্পৰ্কে আলোচনা কৰিছে । আনকি বিধায়ক গৰাকীয়ে পশু চিকিৎসক, গাঁওবুঢ়া সকলক প্ৰতিখন গাঁৱৰ মৃত গাহৰিৰ সংখ্যা সঠিক ৰূপে তালিকা প্ৰস্তুত কৰিবলৈ নিৰ্দেশ দিয়া বুলি উল্লেখ কৰে ।
উল্লেখযোগ্য যে, মৰাণ বিধানসভা সমষ্টিৰ গ্ৰাম্যাঞ্চলৰ ৰাইজে সাধাৰণ ভাৱে গাহৰি পালন কৰি আছিল যদিও বৰ্তমান সময়ত বহু নিবনুৱা শিক্ষিত যুৱকে ব্যৱসায়িক ভিত্তিক গাহৰি পালন কৰিছিল । কিন্তু আফ্ৰিকান ছোৱাইন ফিভাৰে নিৱনুৱা যুৱক-যুৱতী সকলক হতাশ কৰাৰ সময়তে বিধায়ক গৰাকীয়ে গাহৰি পালক সকলৰ খবৰ লোৱাৰ লগতে সাহাৰ্য্য প্ৰদানৰ আশ্বাসক সমষ্টিবাসী ৰাইজে আদৰণি জনাইছে ৷
লগতে পঢ়ক : কাজিৰঙা ৰাষ্ট্ৰীয় উদ্যানত মৃত অৱস্থাত উদ্ধাৰ ঢেঁকীয়াপতীয়া !