ধুবুৰী, 14 জানুৱাৰী : ধুবুৰীত চিনেমাৰ কায়দাৰে অপহৰণৰ এক নাটক ৰচনা কৰি ৰঙা ঘৰৰ আলহী হ'ল এগৰাকী যুৱতী । লগতে গ্ৰেপ্তাৰ হ’ল যুৱতীগৰাকীৰ দুজন বন্ধু(Girl arrested for faking her own kidnapping) । যুৱতীগৰাকীয়ে লগৰ বন্ধু এজনৰ সৈতে মিলি নিজ পিতৃৰ পৰা ধন আদায় কৰাৰ স্বাৰ্থত হিন্দী চিনেমাৰ কায়দাৰে অপহৰণৰ এখন নাটক ৰচিছিল যুৱতীগৰাকীয়ে ৷ কিন্তু যুৱতীগৰাকীৰ পিতৃৰ গোচৰৰ ভিত্তিত আৰক্ষীয়ে চলোৱা তদন্তৰ পিছতেই ওলাই পৰে উৰহি গছৰ ওৰ আৰু অনুসন্ধানৰ অন্তত আৰক্ষীয়ে ফাদিল কৰিলে এই নাটকীয় অপহৰণকাণ্ড ।
উল্লেখ্য যে যুৱতীগৰাকী ধুবুৰী বি এন কলেজত অধ্যয়নৰত এগৰাকী ছাত্ৰী ৷ ইফালে ধুবুৰীৰ ধৰ্মশালা অঞ্চলৰ আবু ছিদ্দিক আহমেদ আৰু ছফিয়ৰ ৰহমান নামৰ যুৱক দুজনৰ সৈতে একেখন মহাবিদ্যালয়ৰে সহপাঠী আছিল ছাত্ৰীগৰাকী ৷ জানিব পৰা মতে, দুদিন পূৰ্বে বন্ধু আবু ছিদ্দিক আহমেদ আৰু ছফিয়ৰ ৰহমানৰ সৈতে লগ হৈ অপহৰণৰ এখন নাটক ৰচে ধুবুৰীৰ কলেজৰোডৰ এটা ঘৰত ভাড়াতীয়া হিচাপে থকা ছাত্ৰীগৰাকীয়ে ।
পূৰ্বে পৰিকল্পনা অনুসৰিয়েই যুৱতীগৰাকী হৈ পৰে সন্ধানহীন ৷ ইয়াৰ পাছতে অপহৰণৰ নাটক ৰচা যুৱতীগৰাকীৰ পিতৃক তিনিও মিলি পাঁচ লাখ টকাৰ ধন দাবী কৰে ৷ ইফালে যুৱতী গৰাকীৰ পিতৃয়ে দিয়া অপহৰণৰ গোচৰৰ ভিত্তিত আৰক্ষীয়ে অপহৃত যুৱতীৰ অনুসন্ধান চলায় ৷ আৰক্ষীৰ অনুসন্ধানত অৱশেষত অপহৃত যুৱতীগৰাকীয়ে নিজেই দুই যুৱকৰ সৈতে মিলি অপহৰণৰ নাটক ৰচা বুলি নিশ্চিত হয় ।
ইতিমধ্যে যুৱতীসহ আবু ছিদ্দিক আহমেদ আৰু ছফিকুৰ ৰহমানক নামৰ যুৱক দুজনক গ্ৰেপ্তাৰ কৰিছে আৰক্ষীয়ে । লগতে আৰক্ষীয়ে জব্দ কৰিছে এটা হস্ত নিৰ্মিত পিষ্টল(Police seizes handmade pistol) ।
লগতে পঢ়ক : আমিনগাঁৱৰ পৰা অপহৃত কিশোৰী
