বিলাসীপাৰা,14 এপ্ৰিলঃ শনিবাৰে পুৱা ৬ বজাৰ পৰা সম্পূৰ্ন মাংগলিক প্ৰথাৰে আৰম্ভ হয় পবিত্ৰ স্নান | ইয়াৰ পিছতে দিনযোৰা কাৰ্যসূচীৰে পালন কৰা হয় শান্তি যজ্ঞানুষ্ঠান | যজ্ঞানুষ্ঠানত সমাগম হয় নামনি অসমৰ বিভিন্ন প্ৰান্তৰ ভক্ত ৰাইজৰ | আনহাতে মন্দিৰ চৌহদত উদযাপন কৰা হয় বিহু, বাঁহ নৃত্য, কুশাণ নৃত্য, কোচ ৰাজবংশী জনগোষ্ঠীয় নৃত্য আদি ৷ অশোকাষ্টমীৰ সমূহ কাৰ্যসূচীত উপস্থিত থাকি স্থানীয় বিধায়ক অশোক কুমাৰ সিংহীয়ে পৰ্যটকৰ আকৰ্ষণৰ কেন্দ্ৰবিন্দু ব্ৰহ্মপুত্ৰ নদী উপকুলত অৱস্থিত চান্দৰডিঙাক পৰ্যটন কেন্দ্ৰ হিচাপে গঢ়ি তোলাৰ বাবে অসম চৰকাৰে এক কোটি চল্লিশ লাখ টকা প্ৰদানৰ ব্যৱস্থা কৰা বুলি ঘোষণা কৰে |
তদুপৰি চান্দৰডিঙাত এটা সদ্ভাৱনা মঞ্চ নিৰ্মাণৰ যাৱতীয় ব্যৱস্থা গ্ৰহণ কৰা হোৱা বুলিও উল্লেখ কৰে ৷ অনুষ্ঠানত উপস্থিত থাকে গোলকগঞ্জৰ বিধায়ক অশ্বিনী ৰায় সৰকাৰ, ৪ নং ধুবুৰী লোকসভা সমষ্টিৰ অসম গণ পৰিষদ দলৰ প্ৰাৰ্থী জাভেদ ইছলাম ৷ ধুবুৰী সমষ্টিৰ অগপ প্ৰাৰ্থী জাভেদ ইছলামে মন্দিৰত বাবাৰ আশীষ গ্ৰহন কৰি তেওঁ ক্ষমতাত আহিলে ক্ষেত্ৰখনক এক বৃহৎ পৰ্যটন কেন্দ্ৰ গঢ়ি তোলাৰ ব্যৱস্থা গ্ৰহণ কৰাৰ কথা উল্লেখ কৰে ৷
