জোনাই, ২ অক্টোবৰঃ অসম চৰকাৰ তথা গড়কাপ্তানী বিভাগৰ চৰম হেমাহিত বৰ্তমানো নিৰ্মাণৰ কাম সম্পূৰ্ণ নহ'ল জোনাই লুহিজান নৈৰ ওপৰৰ দলঙৰ ৷ যোৱা প্ৰায় দহবছৰ পূৰ্বে নিৰ্মাণৰ কাম আৰম্ভ কৰা দলঙখন গড়কাপ্তানী বিভাগৰ দুৰ্বলতা তথা ঠিকাদাৰৰ গাফিলতিত সম্পূৰ্ণ হোৱা নাই নিৰ্মাণৰ কাম ৷ ফলত নৈখনৰ সিপাৰে থকা ১৫-২০ খন গাঁৱৰ ৰাইজৰ লগতে শ শ ছাত্ৰ-ছাত্ৰীয়ে দৈনিক জোনাই সদৰৰ সৈতে যোগাযোগ অব্যাহত ৰাখিছে এক বিপদ সংকুল নৌকা যাত্ৰাৰে ৷
ইফালে নৈখনৰ ওপৰত বৰ্তমানলৈকে দলং নিৰ্মাণৰ কাম সম্পূৰ্ণ কৰিব নোৱাৰা অকৰ্মণ্য জোনাই গড়কাপ্তানী বিভাগে নৈখনৰ দুয়ো পাৰৰ বাবে ৰাইজক যোগান দিছে এখন পচা নাও ৷ কেৱল পচাই নহয় নাওখনৰ কেইবা ঠাইতো কাঠৰ টুকুৰাৰে মাৰিছে টাপলি ৷ এনে পচা নাৱেৰে অঞ্চলটোৰ শ শ ছাত্ৰ-ছাত্ৰীয়ে ভৱিষ্যৎ গঢ়াৰ লক্ষ্যৰে বিপদকো নেওচি দৈনিক যাতায়ত অব্যাহত ৰাখিছে জোনাই সদৰৰ স্কুল কলেজসমূহলৈ ৷ আনহাতে ইমানৰ পিছতো জোনাই মহকুমা প্ৰশাসন অথবা বিধায়ক ভূৱন পেগু আৰু সাংসদ প্ৰদান বৰুৱাই কোনোধৰণৰ গুৰুত্ব নিদিয়াৰ অভিযোগ উত্থাপিত হৈছে ৷ সেয়ে শীঘ্ৰে দলঙখনৰ নিৰ্মান সম্পূৰ্ন কৰি মুকলি কৰিবলৈ বিভাগীয় কৃতপক্ষৰ ওচৰত দাবী জনাইছে অঞ্চলবাসীয়ে ।
আৰু পঢ়কঃ পূৰ্ৱতকৈও কঠিন ৰূপত আহিব নাগৰিকত্ব সংশোধনী বিধেয়ক !!
