ধেমাজি,12 এপ্ৰিল: ৰাজ্যত হেঁপাহৰ ৰঙালীক আদৰাৰ ব্যাপক প্ৰস্তুতি ৷ মহিলাই বিহুৰ পিঠা-পনা বনোৱাৰ লগতে শিপিনীয়ে বিহুৱান বোৱাত ব্যস্ত ৷ ইয়াৰ সমান্তৰালভাৱে ধেমাজিৰ কাছাৰী ময়দানত অনুষ্ঠিত আঠদিনীয়া কাৰ্যসূচীৰ বিহু নাচ আৰু ঢোল বাদন কৰ্মশালাৰ দেওবাৰে সফল সামৰণি পৰে । ধেমাজি আঞ্চলিক ছাত্ৰ সন্থাৰ উদ্যোগত অনুষ্ঠিত হোৱা কৰ্মশালাত বিহু সমাজ্ঞী হিমাশ্ৰী শইকীয়া, ধেমাজিৰ বিহুৱতী পল্লৱী গগৈ, বিহুৱা প্ৰণৱ দিহিঙীয়াৰ লগতে সতীশ বৰুৱাই বিহুৰ প্ৰশিক্ষণ দিয়ে ৷
ৰঙালী বিহুক লৈ আয়োজন কৰা এই কৰ্মশালাত অংশগ্ৰহণ কৰে প্ৰায় তিনি শতাধিক শিশু-কিশোৰী নাচনী, যুৱতী আৰু প্ৰায় এশ শিশু ঢুলীয়াই ৷ উল্লেখ্য যে, দেওবাৰে সামৰণি পৰা কৰ্মশালাত আঞ্চলিক ছাত্ৰ সন্থাৰ তৰফৰ পৰা বিহু প্ৰশিক্ষকসকলক সম্বৰ্ধনা জনায় ৷
আনহাতে, বিহু সমাজ্ঞী হিমাশ্ৰী শইকীয়াই কৰ্মশালাত অংশগ্ৰহণ কৰি আনন্দিত হোৱাৰ লগতে ক’ভিড প্ৰট’কল মানি বিহু পালন কৰিবলৈ আহ্বান জনাই জনপ্ৰিয় বিহুৱতী গৰাকীয়ে ৷
লগতে পঢ়ক: বড়ো সাহিত্য সভাৰ সফল সামৰণি
