ননৈ নৈৰ বাঢ়নী পানীত উটি গ'ল এজন : কেমেৰাত বন্দী দৃশ্য

দৰং, 12 জুলাইঃ দৰঙত কালৰূপ ধাৰণ কৰিছে ননৈ নৈৰ বাঢ়নী পানীয়ে ৷ ফেনে ফোটোকাৰে বাঢ়ি অহা বাঢ়নী পানীৰ প্ৰৱল সোঁতে দেওবাৰে ছিগি নিয়ে ননৈ নৈ পূৱ পাৰৰ মথাউৰি ৷ ছিপাঝাৰৰ পাথৰিঘাটৰ আলিখাপাৰাত দেওবাৰে পুৱাৰ ভাগত বাঢ়নী পানীয়ে ভাগি নিয়ে মথাউৰিটো ৷ যাৰ ফলত সম্প্ৰতি জলমগ্ন হৈ পৰিছে পাথৰিঘাটৰ বিস্তীৰ্ণ অঞ্চল ৷ প্ৰায় 20 খনতকৈয়ো অধিক গাঁও ইতিমধ্যে জলমগ্ন হৈছে ৷

ইয়াৰ মাজতে সংঘটিত হয় এক অঘটন ৷ আলিখাপাৰাৰ ভগ্ন মথাউৰিৰ পৰা পানীত পৰি উটি যায় এগৰাকী লোক ৷ পানীৰ প্ৰৱল সোঁতে লোকগৰাকীক উটুৱাই লৈ যায় যদিও কথমপি ৰক্ষা পৰে তেওঁৰ প্ৰাণ ৷ স্থানীয় লোকৰ অভিযোগ অনুসৰি, জলসম্পদ বিভাগৰ তৎপৰতাত মথাউৰিটো নিৰ্মাণ কৰি থকা হৈছিল যদিও, ঠিকাদাৰ আৰু বিভাগীয় কৰ্তৃপক্ষৰ হেমাহিৰ বাবে সম্পূৰ্ণ হৈ নুঠিল মথাউৰিটো ৷ যাৰ বাবে দেওবাৰে পুৱা এনে ঘটনা সংঘটিত হ'বলৈ পায় ৷

লগতে পঢ়কঃ দিখৌমুখত বানৰ সংহাৰী ৰূপঃ জলমগ্ন 10 খনৰো অধিক গাওঁ