মঙলদৈ,6 ফেব্ৰুৱাৰী: বৃহস্পতিবাৰে উন্মোচন কৰা হয় বিশেষভাৱে সক্ষম মঙলদৈ হাউলী মোহনপুৰৰ জেচমিন আৰা আহমেদৰ চতুৰ্থ খন গ্ৰন্থ 'জেচমিনৰ ডায়েৰী' ৷ 'জেচমিনৰ ডায়েৰী' উন্মোচন অনুষ্ঠানত উপস্থিত থাকে বিশিষ্ট সাহিত্যিক,সাংবাদিক হোমেন বৰগোহাঞি,বিশিষ্ট সাহিত্যিক ডাঃ অঞ্জনজ্যোতি চৌধুৰী, অসম সাহিত্য সভাৰ প্ৰাক্তন উপ-সভাপতি ইদ্ৰিছ আলী,বিশিষ্ট সাহিত্যিক ডাঃ অমৰেন্দ্ৰ নাৰায়ণ দেৱ,গুৱাহাটী দন্ত চিকিৎসা মহাবিদ্যালয়ৰ অধ্যাপিকা ডাঃ ৰুবী কটকীকে আদি কৰি কেইবাগৰাকী বিশিষ্ট ব্যক্তি ৷
উল্লেখ্য যে,এসময়ৰ কোচ ৰজাৰ ৰাজধানী মঙলদৈ চহৰৰ নিকটৱৰ্তী হাউলী মোহনপুৰৰ নিবাসী চাহাবুদ্দিন আহমেদ আৰু গুলেজান বেগমৰ চতুৰ্থ সন্তান জেচমিন আৰা আহমেদ স্নায়ুৰোগত আক্ৰান্ত ৷ এই ৰোগত আক্ৰান্ত হোৱাৰ বাবে জেচমিন আৰা আহমেদে কথা কোৱাৰ বাদে শৰীৰৰ কোনো অংগই লৰচৰ কৰিব নোৱাৰে ৷ কিন্তু এই ৰোগৰ সকলো বাধাকো নেওচি বিচনাত আশ্ৰয় লৈ হ’লেও লিখি গৈছে ইখনৰ পাছত সিখন গ্ৰন্থ ৷ বিচনাত আশ্ৰয় লৈ হ’লেও শ্ৰুতলিপি দি কিতাপ লিখিবলৈ প্ৰয়াস কৰি গৈছে এই লেখিকা গৰাকীয়ে ৷
প্ৰবল মেধাৱ সম্পন্ন, এসময়ৰ এগৰাকী দক্ষ শিক্ষয়িত্ৰী হোৱাৰ লগতে এগৰাকী ভাল খেলুৱৈ আছিল এই গৰাকী লেখিকা ৷ এই গৰাকী লেখিকাই লিখি উলিওৱা গ্ৰন্থ কেইখন হৈছে 'মই জেচমিনে কৈছো','এদিনৰ ডায়েৰি','সপোন হেৰুওৱা নৈখন' আৰু ন কৈ প্ৰকাশিত গ্ৰন্থ 'জেচমিনৰ ডায়েৰী' ৷
লগতে পঢ়ক : প্ৰধানমন্ত্ৰীৰ সভা বৰ্জন কৰিবলৈ চাহ শ্ৰমিকক আহ্বান আটছাৰ
