বিহালী, 20 মে': বিহালীৰ হেলেমৰ দুলুং মুখত অব্যাহত আছে বনৰীয়া হাতীৰ সন্ত্ৰাস । এটা প্ৰকাণ্ড বনৰীয়া হাতীয়ে বনাঞ্চলৰ পৰা খাদ্য সন্ধানত জনাঞ্চললৈ উলাই আহি ভাঙি পেলালে চাৰিটাকৈ পৰিয়ালৰ বাসগৃহ ।
অৱশেষত স্থানীয় লোকে হাতীটোক খেদি পঠিয়াবলৈ সক্ষম হয় । অঞ্চলটোৰ ৰাইজৰ অভিযোগ অনুসৰি বিভাগী কৰ্তৃপক্ষক বনৰীয়া হাতীৰ তাণ্ডৱৰ বিষয়ত অৱগত কৰিছে যদিও এই পৰ্যন্ত কোনো ব্যৱস্থা গ্ৰহণ কৰা নাই বিভাগে । চেঙেলীজান খণ্ড বন বিষয়াৰ কাৰ্যালয়ৰ পৰা নাতি দূৰৈত আৰু ওচৰতে বেটেলিয়ান কেম্প থকাৰ পাচতো হেলেমৰ দুলুং মুখৰ সমগ্ৰ অঞ্চলটোৰ প্ৰায়ে বনৰীয়া হাতীৰ আক্ৰমণৰ বলি হৈ আহিছে ৷
উল্লেখ্য যে, বনৰীয়া হাতীৰ আক্ৰমণৰ সময়ত বন বিভাগক বাৰম্বাৰ খবৰ দিয়াৰ পাছতো বন বিভাগৰ লোক ঘটনাস্থলীত উপস্থিত হোৱা নাছিল বুলি অভিযোগ তুলিছে স্থানীয় লোকে ৷ ৰাইজে সেয়েহে নৱ নিৰ্বাচিত বনমন্ত্ৰী গৰাকীক বিহিত ব্যৱস্থা ও ক্ষতিপূৰণৰ দাবী তুলিছে ।
লগতে পঢ়ক: আইপিএছ বিষয়া হৈও কি আক্ষেপ থাকি গ'ল আনন্দ মিশ্ৰাৰ ?