বিশ্বনাথ, 17 চেপ্তেম্বৰঃ টুলুঙা নাৱেৰে দৈনিক বিপদ সংকুল যাত্ৰা গহপুৰৰ ৰাওনামুখ গাঁও পঞ্চায়তৰ নামচৰাইবাৰী,গছপুৰ,ছ'গুৰি আদি অঞ্চলৰ দুই শতাধিক ছাত্ৰ-ছাত্ৰীৰ ৷ শিক্ষাগ্ৰহণৰ বাবেই এই বিপদসংকুল যাতায়ত কৰিবলৈ বাধ্য হৈছে ছাত্ৰ-ছাত্ৰীসকলে। মধ্য চৰাইবাৰী আৰু নামচৰাইবাৰীৰ মাজত থকা নামচৰাইবাৰী ঘাটত থকা একমাত্ৰ টুলুঙা নাওখনেৰে বিদ্যালয়লৈ যাব লাগে ছাত্ৰ-ছাত্ৰীসকল।
ঘাটটোত থকা একমাত্ৰ নাও খনৰ বাবেই সময়মতে বিদ্যালয়ত উপস্থিত হ'ব নোৱাৰে বহু ছাত্ৰ-ছাত্ৰী । টুলুঙা নাৱেৰে নামচৰাইবাৰী ঘাট পাৰ হোৱা ২০০ ৰো অধিক ছাত্ৰ-ছাত্ৰীয়ে লোহিতমুখ,ৰাওনামুখ,চৰাইবাৰী অঞ্চলত থকা বিভিন্ন বিদ্যালয়লৈ যোৱাৰ লগতে একাংশই উচ্চ শিক্ষা গ্ৰহণৰ বাবে গহপুৰ আৰু কলাবাৰীত থকা মহাবিদ্যালয়লৈ এইদৰে যাতায়াত কৰিবলৈ একপ্ৰকাৰে বাধ্য হৈ পৰিছে । পৰিৱৰ্তনকামী চৰকাৰৰ উন্নয়নমূলক আঁচনিয়ে স্পৰ্শ নকৰা নামচৰাইবাৰী,গছপুৰ,ছ'গুৰি আদি অঞ্চলৰ ছাত্ৰ-ছাত্ৰী সকলে অতি শীঘ্ৰেই নামচৰাইবাৰী ঘাটত এখন ডাঙৰ নাও অথবা এখন দলং নিৰ্মাণৰ ব্যৱস্থা কৰি দিবলৈ আহ্বান জনাইছে গহপুৰৰ বিধায়ক তথা অসম চৰকাৰক ৷
