জনীয়া, 22 মে': মন্দিয়া প্ৰাথমিক বিদ্যালয়ত মধ্যাহ্ন ভোজনৰ নামত ব্যাপক অনিয়ম সংঘটিত ৷ বিদালয় খনৰ প্ৰধান শিক্ষক জনৰ অনিয়মীয়া উপস্থিতিয়ে সৃষ্টি কৰিছে ব্যাপক অৰাজকতা ৷ বৰপেটাৰ মন্দিয়া শিক্ষাখণ্ডৰ 926 নং মহম্মদপুৰ প্ৰাথমিক বিদ্যালয়ৰ প্ৰধান শিক্ষক দেবেন দাসৰ বিৰুদ্ধে উত্থাপিত হৈছে এই গুৰুত্বপূৰ্ণ অভিযোগ ৷ উল্লেখ্য যে ৰমজান মাহৰ পবিত্ৰ ৰোজা চলি থকাৰ অচিলাৰে প্ৰধান শিক্ষকগৰাকীয়ে বিদ্যালয় খনত বন্ধ ৰাখিছে ছাত্ৰ-ছাত্ৰী সকলৰ মধ্যাহ্ন ভোজন ৷ প্ৰধান শিক্ষক গৰাকীৰ বিৰুদ্ধে নীতি বহিৰ্ভূতভাৱে এই ব্যৱস্থা বন্ধ ৰাখি মধ্যাহ্ন ভোজনৰ নামত আবন্টিত চাউল আৰু চৰকাৰী ধন আত্মসাৎ কৰাৰ লগতে বিদ্যালয়ত অনিয়মীয়াকৈ উপস্থিত থকাৰো অভিযোগ উত্থাপন কৰিছে স্থানীয় ৰাইজে ৷ উক্ত বিদ্যালয় খনত ছাত্ৰ-ছাত্ৰী নিয়মিতভাৱে আহে যদিও বিদ্যালয়খনত 6 জনকৈ শিক্ষক থকা সত্বেও দৈনিক উপস্থিত থাকে মাত্ৰ দুইৰ পৰা তিনিজনকৈ শিক্ষক ৷
যাৰ ফলত নিতৌ দিনৰ এঘাৰ বজাতেই শ্ৰেণীকোঠাৰ পৰিৱৰ্তে বিদ্যালয় চৌহদত খেলি থকা দেখা যায় ছাত্ৰ-ছাত্ৰী সকলক ৷ প্ৰধান শিক্ষক দেবেন দাসে নিজৰ ইচ্ছা অনুযায়ীয়েই দিনৰ বাৰ বজাতে বিদ্যালয় ছুটী দিয়া পৰিলক্ষিত হৈছে ৷ ছাত্ৰ-ছাত্ৰী সকলৰ জীৱনক লৈ হেতালি খেলাৰ অভিযোগত প্ৰাথমিক বিদ্যালয় খনৰ প্ৰধান শিক্ষক গৰাকীৰ বিৰুদ্ধে বিভাগীয় কৰ্তৃপক্ষই কি ব্যৱস্থা গ্ৰহণ কৰে সেয়া সময়তহে লক্ষণীয় হ'ব ৷
