বৰপেটাৰোড, 25 ডিচেম্বৰঃ নলবাৰীৰ পিচত এইবাৰ বৰপেটাৰোডত বিজেপিৰ মৌন শান্তি সমদল ৷ বুধবাৰে সৰভোগ সমষ্টিৰ বৰপেটাৰোডত আয়োজন কৰা শান্তি সমদলত অংশগ্ৰহণ কৰে মন্ত্ৰী ড৹ হিমন্ত বিশ্ব শৰ্মাই ৷ বৰপেটাৰোড ষ্টেডিয়ামৰ পৰা চহৰৰ মাজেৰে বিশাল মৌন সমদল কৰি বিজেপিৰ বৰপেটাৰোড নগৰ মণ্ডলৰ কাৰ্যালয় উদ্বোধন কৰে মন্ত্ৰী ড৹ হিমন্ত বিশ্ব শৰ্মাই ৷ সমদলৰ পিচত আয়োজিত সভাত ড৹ শৰ্মাই প্ৰশংসা কৰে সদৌ অসম ছাত্ৰ সন্থাক ৷ তেওঁ কয় যে আছুৰ লগত বিজেপিৰ নীতিগত বিৰোধ নাই ৷ আছুই অসমক ভাল পাই আন্দোলন কৰিছে ৷ সদৌ অসম ছাত্ৰ সন্থাইও অসমক ভাল পাই আৰু আমিও অসমক ভাল পাওঁ বুলি মন্ত্ৰীগৰাকীয়ে উল্লেখ কৰে ৷ লগতে কয় যে আছু আৰু আমাৰ ৰাস্তা বেলেগ যদিও লক্ষ্য আৰু উদ্দেশ্য এটাই ৷ এই আইনৰ সুযোগ লৈ যিসকলে নিকৃষ্ট ৰাজনীতি কৰিছে তাক গৰিহণা দিয়ে ড৹ শৰ্মাই ৷
সভাত মন্ত্ৰীগৰাকীয়ে কংগ্ৰেছ দলক আক্ৰমণৰ লক্ষ্য কৰি লৈ ক্ষুৰধাৰ সমালোচনা কৰে ৷ তেওঁ কয় যে অসম বিধানসভাৰ অধ্যক্ষৰ আসন শুৱনি কৰা পৃথিৱী মাঝিৰ দৰে ব্যক্তিয়ে ডিব্ৰুগড়ত কৈছে চাহ বাগিচাত আহি বিদেশী সোমাই যাব ৷ যিসকলে আইনখন পঢ়িছে তেওঁলোকে গম পাইছে 2014 চনৰ আগত অহা হিন্দু, শিখ, বৌদ্ধ, পাৰ্চী আৰু জৈনক নাগৰিকত্ব দিয়া হ’ব ৷ লগতে কয় নৰেন্দ্ৰ মোডী দেশৰ প্ৰধানমন্ত্ৰী হোৱাৰ পিচত বাংলাদেশত এজনো হিন্দুৰ ওপৰত আক্ৰমণ হোৱা নাই আৰু আগলৈকেও নহ’ব ৷ তেওঁ উল্লেখ কৰে যে কংগ্ৰেছৰ দোষৰ কাৰণেই আজি অসমৰ এনে অৱস্থাৰ সৃষ্টি হৈছে ৷
আনহাতে ড৹ হিমন্ত বিশ্ব শৰ্মাই, তৰুণ গগৈ ডাঙৰীয়াই কৈছে 2014 চনলৈকে ভোটাৰ তালিকাত থকা লোকক অসমৰ এন.আৰ.চিত স্থান দিব লাগে ৷ তাৰমানে পাঁচ লাখ হিন্দু মানুহৰ লগতে সাত লাখ বিশ হাজাৰ বাংলাদেশী মুছলমানৰ নাম এন আৰ চিত অন্তৰ্ভুক্ত কৰি মুঠ বাৰ লাখ বিদেশীক এন আৰ চিত নাম অন্তৰ্ভুক্ত কৰিব লাগে বুলি কটাক্ষ কৰে ৷ লগতে মন্ত্ৰীগৰাকীয়ে আৰু কয় যে অসম চুক্তিৰ উলংঘা 1987 চনত হৈছিল ৷ যেতিয়া ৰাজীৱ গান্ধী আৰু প্ৰফুল্ল কুমাৰ মহন্তই নাগৰিকত্ব আইনৰ সংশোধন কৰিছিল ৷ বিজেপিৰ এই মৌন সমদলত ৰাজ্যিক বিজেপিৰ সভাপতি ৰণজিৎ কুমাৰ দাস, মঙলদৈ সমষ্টিৰ সাংসদ দিলীপ শইকীয়া, বিজেপিৰ সাংগঠনিক সম্পাদক ফনীন্দ্ৰদেৱ শৰ্মাকে ধৰি কেবাজনো বিজেপি নেতা উপস্থিত থাকে ৷
আৰু পঢ়কঃ অখিল গগৈৰ মুক্তিৰ দাবীত উত্তাল টীয়ক
