বৰপেটাৰোড,৬ মে': সমগ্ৰ ভাৰতবৰ্ষত মূল্যবৃদ্ধিয়ে এক ভয়ংকৰ ৰূপ ধাৰণ কৰিছে (Price hike in India)৷ বিজেপিৰ নিজস্ব নীতিৰ ফলত সমগ্ৰ দেশখনতে মূল্যবৃদ্ধিয়ে সাধাৰণ লোকক বিপদত পেলাইছে ৷ মানুহৰ নিত্য প্ৰয়োজনীয় সামগ্ৰী মূল্যবৃদ্ধিৰ ফলত সেইবোৰ বহুতে ক্ৰয় কৰিব পৰা নাই ৷ এই ক্ষেত্ৰত ভাৰতীয় জনতা পাৰ্টিক সম্পূৰ্ণৰূপে দোষাৰোপ কৰে সৰভোগৰ বিধায়ক মনোৰঞ্জন তালুকদাৰে (Sorbhog MLA criticizes BJP government over price rise)৷
সৰভোগৰ বিধায়ক হিচাপে নিৰ্বাচিত হোৱাৰ এবছৰ পূৰ্ণ হোৱা উপলক্ষে বৃহস্পতিবাৰে সৰভোগৰ গড়কাপ্তানী বিভাগৰ বাংলোত আয়োজন কৰা হয় বিশেষ অনুষ্ঠানৰ । এই অনুষ্ঠানত বিধায়ক গৰাকীয়ে এবছৰীয়া কামকাজৰ আলোকপাত কৰাৰ সময়তে বিজেপি চৰকাৰক তীব্ৰ সমালোচনা কৰে । তেওঁৰ মতে ক্ষমতাত অহাৰ পাছতেই প্ৰধানমন্ত্ৰী নৰেন্দ্ৰ মোডীয়ে দেশৰ "এছেনচিয়েল কমোডিটিছ এক্ট-1955"(Essential commodities act) ৰ পৰা নিত্য প্ৰয়োজনীয় সামগ্ৰীসমূহ বাহিৰ কৰাৰ ফলত বজাৰত বস্তুৰ মূল্য নিৰ্ধাৰণৰ সুযোগটো কৰ্প'ৰেট গোষ্ঠীক এৰি দিছে । আনকি ইয়াক নিয়ন্ত্ৰণ কৰাৰ বাবে চৰকাৰে কোনো ব্যৱস্থা ৰখা নাই বুলিও তেওঁ অভিযোগ কৰে ।
ফলত কৰ্প'ৰেট গোষ্ঠীয়ে অবাধে বয়বস্তুৰ মূল্যবৃদ্ধি কৰিছে আৰু চৰকাৰে দূৰৈৰ পৰা নীৰৱ দৰ্শক হিচাপে পৰ্যবেক্ষণ কৰি আছে বুলিও অভিযোগ উত্থাপন কৰে বিধায়ক মনোৰঞ্জন তানুকদাৰে ৷ বিভিন্ন সামগ্ৰীৰ মূল্যবৃদ্ধিৰ ফলত সাধাৰণ মানুহৰ জীৱন নিৰ্বাহ অতি কষ্টকৰ হৈ পৰা বুলি উল্লেখ কৰি ইয়াৰ কাৰণে চৰকাৰৰ নীতিকেই দোষী বুলি অভিযোগ কৰে বিধায়কগৰাকীয়ে । মনোৰঞ্জন তালুকদাৰৰ মতে যাতে অবাধে বয়বস্তু সৰবৰাহ কৰিব নোৱাৰে, অবাধে বয়বস্তু মজুত কৰি ৰাখিব নোৱাৰে তাৰ বাবে এছেনচিয়েল কমোডিটিছ এক্ট-1955 ৰ অধীনত চৰকাৰ কঠোৰ হ'ব লাগিছিল ৷
চৰকাৰৰ নিয়ন্ত্ৰণ থাকিলে অত্যাৱশ্যকীয় সা-সামগ্ৰীৰ দাম এইদৰে বৃদ্ধি নহ'লহেতেন বুলিও তাৎপৰ্যপূৰ্ণ মন্তব্য কৰে বিধায়ক মনোৰঞ্জন তালুকদাৰে ৷ ক'ভিড পৰিস্থিতিয়ে সাংঘাতিকভাৱে ক্ষতি কৰাৰ কথা দোহাৰি মানুহৰ জনমূৰি আয় অৱনমিত হৈছে বুলি উল্লেখ কৰিছে বিধায়ক মনোৰঞ্জন তালুকদাৰে ৷ ফলত মুদ্ৰাস্ফীতি হৈছে বুলিও কয় বিধায়ক তালুকদাৰে ৷
বিধায়কগৰাকীৰ মতে সৰভোগৰ প্ৰাক্তন বিধায়ক তথা বৰ্তমানৰ মন্ত্ৰী ৰণজিৎ কুমাৰ দাসে তেওঁৰ বিগত ৰাজনৈতিক জীৱনত কিছুমান অ-প্ৰাসঙ্গিক, অবাঞ্চিত, অবান্তৰ, অবাস্তৱ আৰু বুদ্ধিহীন মন্তব্য কৰিছে ৷ মন্ত্ৰী ৰণজিৎ দাসৰ শেহতীয়া কেইবাটাও বিতৰ্কিত মন্তব্যৰ প্ৰতিক্ৰিয়া দিয়াৰ ইচ্ছা নাই বুলি কয় বিধায়ক মনোৰঞ্জন তালুকদাৰে ৷
লগতে পঢ়ক:ভূপেন বৰা দলৰ পৰা আঁতৰি গ’লেই দলটো ঠিক হৈ যাব : ৰূপজ্যোতি কুৰ্মী
