বৰপেটাৰোড 30 জুলাই: বৰপেটাৰোডৰ সৰভোগৰ চকচকাৰ মেদা গাঁওৰ ৰবেন দাস আৰু সুনীতি দাসৰ সন্তান মৃণাল দাস ৮ বছৰ বয়সৰ পৰাই এক জটিল ৰোগত আক্ৰান্ত হৈ হাত ভৰি বিকল হৈ পৰিছে । যাৰ ফলত মৃণাল দাস নামৰ এই কিশোৰটোৱে বিদ্যালয়লৈ যাব নোৱাৰা হ’ল আৰু হুইল চিয়াৰতে বহি দিন কটাবলগীয়া হৈছে । কিশোৰটিৰ পিতৃ ৰবেন দাসে দিন হাজিৰা কৰি কোনোমতে পৰিয়াল পোহপাল দি আহিছে যদিও কষ্টোপাৰ্জিত ধনেৰে নিজৰ সন্তানক বহু চিকিৎসা কৰিও কোনো সুফল নাপালে । সেয়ে উপায়ন্তৰ হৈ সৰভোগৰ চকচকাৰ মেদা গাঁৱৰ এই কিশোৰটিৰ পিতৃ-মাতৃৰ লগতে দুৰ্ভগীয়া কিশোৰটিয়েও মুখ্যমন্ত্ৰীৰ সহায় বিচাৰিছে ৷
কিশোৰটিয়ে হুইল চিয়াৰত বহি বহি মোবাইলত মুখ্যমন্ত্ৰীৰ কথা শুনি থাকে ৷ কিশোৰটিয়ে মুখ্যমন্ত্ৰীক মামা বুলি সম্বোধন কৰি কৈছে- মামা, মই আগতে স্কুলত গৈছিলোঁ, খোজ কাঢ়িছিলো, দৌৰি দৌৰি খেলিবলৈ গৈছিলোঁ কিন্তু এতিয়া মই হুইল চিয়াত বহি থাকোঁ ৷ মোক চিকিৎসা কৰি ভাল কৰি দিয়ক ৷’’
উল্লেখ্য যে, ৮ বছৰ বয়সলৈকে সৰভোগৰ এই কিশোৰটি কিশোৰ সম্পূৰ্ণৰূপে সুস্থ আছিল । সমনীয়াৰ সৈতে খেলা-ধূলা কৰি সময় অতিবাহিত কৰি পখিলা খেদাৰ বয়সতে কিশোৰটিয়ে নিজ ঘৰতেই হুইল চিয়াত বহি সময় অতিবাহিত কৰিবলগীয়া হৈছে ৷
ইফালে দুৰ্ভগীয়া কিশোৰটিৰ পিতৃ ৰবেন দাসে কিশোৰটিৰ চিকিৎসাৰ বাবে প্ৰথমতে সৰভোগৰ ভুলুকাদোৱাৰ চিকিৎসালয়লৈ লৈ গৈছিল যদিও চিকিৎসকে বৰপেটা মেডিকেল কলেজ হাস্পতালতলৈ যাবলৈ পৰামৰ্শ দিছিল ৷ সেইমৰ্মে পিতৃয়ে বৰপেটা মেডিকেল কলেজলৈ নি ভৰ্তি কৰাইছিল ৷
কিন্তু বৰপেটা মেডিকেল কলেজৰ চিকিৎসকে কিশোৰটিক উন্নত চিকিৎসাৰ বাবে গুৱাহাটী মেডিকেল কলেজলৈ প্ৰেৰণ কৰে ৷ জিএমচিএইচটো চিকিৎসাৰ বাবদ ইটো-সিটো পৰীক্ষাৰ নামত পৰিয়ালটোৱে বহু টকা খচৰ কৰিও কোনো সুফল নাপালে । আৰ্থিক দিশত জুৰুলা হৈ পৰা কিশোৰটিৰ পিতৃ-মাতৃয়ে সম্প্ৰতি টকাৰ অভাৱত নিজৰ সন্তানক চিকিৎসা কৰিব পৰা নাই । সেয়ে মুখ্যমন্ত্ৰী ড° হিমন্ত বিশ্ব শৰ্মালৈ পৰিয়ালটোৱে কাতৰ অনুৰোধ জনাইছে যাতে কিশোৰটিৰ চিকিৎসাৰ ক্ষেত্ৰত সহায় কৰে ৷
তাৰোপৰি কোনো সদাশয় লোকে যদি কিশোৰটিৰ চিকিৎসাৰ বাবে সহায় কৰিব বিচাৰে তেন্তে পিতৃ ৰবেন দাসৰ ভাৰতীয় ষ্টেট বেংকৰ DAKSHIN GANAKGARI BRANCH, IFSC CODE- SBIN0009578 A/C No. 31779731503 একাউণ্টত আৰ্থিকভাৱে সহায় কৰিবলৈ অনুৰোধ জনাইছে । কিশোৰটিৰ পিতৃ ৰবেন দাসৰ সৈতে 98642 20451 এই নম্বৰত পোনপটীয়াকৈ যোগাযোগ কৰিবলৈ বিনম্ৰতাৰে অনুৰোধ জনাইছে কিশোৰটিৰ পিতৃ ৰবেন দাসে ৷
লগতে পঢ়ক: Minor Suffering From Cancer: পখিলা খেদাৰ বয়সতেই কৰ্কট ৰোগত আক্ৰান্ত যোৰহাটৰ এটি শিশু; সহায়ৰ আহ্বান
