বাক্সা, ১৯ জুলাই : বাক্সাৰ শালবাৰীৰ আওহাটাত এগৰাকী কিশোৰীৰ মৃতদেহ উদ্ধাৰ হোৱা ঘটনাই তীব্ৰ চাঞ্চল্যৰ সৃষ্টি কৰিছে । ঘৰৰ সমীপৰে এটা বোৱতী সুঁতিত উদ্ধাৰ হয় ১৫ বছৰীয়া কিশোৰী গৰাকীৰ মৃতদেহ । দেওবাৰৰ সন্ধিয়াৰ পৰা সন্ধানহীন হৈ আছিল কিশোৰীগৰাকী ৷
স্থানীয় লোকে সদৰী কৰা মতে, সন্ধানহীন হোৱাৰ পূৰ্বৰে পৰা কিশোৰীগৰাকীৰ ঘৰত নাছিল কোনো লোক । পিতৃহাৰা কিশোৰী গৰাকীৰ মাতৃ আৰু ভনীয়েক সেই সময়ত মোমায়েকৰ ঘৰত আছিল ৷ দেওবাৰে দিনটোত কিশোৰীগৰাকী ঘৰত অকলশৰে আছিল ৷ উল্লেখ্য যে, দশম শ্ৰেণীত পঢ়ি থকা কিশোৰী গৰাকীৰ নাম চুমি নাথ ৷
আবেলিপৰত মোমায়েকৰ ঘৰৰ পৰা উভতি আহি মাক আৰু ভনীয়েকে কিশোৰীগৰাকীক ঘৰত লগত পোৱা নাছিল ৷ সন্ধিয়া পৰলৈ কিশোৰীগৰাকী ঘৰলৈ উভতি নহাত সন্দেহ হৈছিল মাক-ভনীয়েকৰ ৷ পৰৱৰ্তী সময়ৰ বিচাৰ-খোঁচাৰ কৰিছিল যদিও কিশোৰীগৰাকীৰ কোনো সন্ধান লাভ কৰা নাছিল ৷
অৱশেষত সোমবাৰে দিনৰ ভাগত কিশোৰীগৰাকীৰ মৃতদেহ উদ্ধাৰ হয় ৷ ঘৰত কোনো নথকাৰ সুযোগ গ্ৰহণ কৰি কোনো দুষ্ট প্ৰকৃতিৰ লোকে কিশোৰীগৰাকীক হত্যা কৰাৰ সন্দেহ প্ৰকাশ কৰিছে স্থানীয় লোকে ৷ দণ্ডাধীশ-আৰক্ষীৰ উপস্থিতিত মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে জিলা সদৰ মুছলপুৰলৈ প্ৰেৰণ কৰা হয় ৷
লগতে পঢ়ক: সান্ধ্য আইন উলংঘা কৰি গ্ৰেপ্তাৰ 8 জন
