স্পৰ্টছ ডেস্ক, 21 অক্টোবৰ : নিউজীলেণ্ডৰ বিৰুদ্ধে খেলৰ পূৰ্বে নেট চেচনৰ সময়ত তাৰকা বেটছমেন সূৰ্যকুমাৰ যাদৱৰ সোঁফালৰ আগবাহুত খুন্দা মৰাৰ ফলত শনিবাৰে ভাৰতীয় দলটোৱে আঘাতৰ আতংকৰ সন্মুখীন হয় ৷ অল ৰাউণ্ডাৰ হাৰ্দিক পাণ্ডিয়া খেলখনৰ বাবে উপলব্ধ নোহোৱাৰ বাবে সূৰ্যকুমাৰে নিউজীলেণ্ডৰ বিৰুদ্ধে বিশ্বকাপৰ খেলখন খেলাৰ সম্ভাৱনা আছিল যদিও এই নতুন পৰিঘটনাই তেওঁৰ উপলব্ধতাক লৈয়ো প্ৰশ্নবোধক চিহ্ন উত্থাপন কৰিছে ৷ দেওবাৰে নিউজীলেণ্ডৰ বিৰুদ্ধে অনুষ্ঠিত হ’ব লগা গুৰুত্বপূৰ্ণ মেচখনৰ পূৰ্বে এই ঘটনাই চিন্তাত পেলাইছে ভাৰতীয় দলক ৷
পিটিআইৰ উদ্ধৃতিৰ সূত্ৰ অনুসৰি তেওঁ সুস্থ হৈ উঠিছে বাবে আগন্তুক খেলখনৰ বাবে তেওঁক সম্পূৰ্ণৰূপে বাদ দিব নোৱাৰি ৷ ষ্টাৰ বেটছমেনজনক বৰফৰ পেকেৰে চিকিৎসা কৰাৰ পিছত বিষটো যথেষ্ট কমি আহিল আৰু লগে লগে এক্স-ৰে লোৱা নহ’ল ৷ কিন্তু শৰীৰটো এবাৰ ঠাণ্ডা হ’লে আঘাতৰ প্ৰকৃতিয়েই পৰৱৰ্তী কাৰ্যপন্থা নিৰ্ধাৰণ কৰিব ৷
ইফালে বেটছমেন ঈশান কিষণক অনুশীলনৰ সময়ত বেটিং কৰি থকা অৱস্থাত ডিঙিৰ পিছফালে মৌমাখিয়ে কামোৰে ৷ এই ঘটনাৰ পূৰ্বে ঈশান কিষণে যথেষ্ট সময় বেটিং কৰিছিল যদিও মৌমাখিয়ে কামোৰাৰ পিছত বিষত জপিয়াই দৌৰি থকা দেখা গৈছিল ৷ লগতে এই ঘটনাৰ পিছত তেওঁ নেট অনুশীলনত অংশ লোৱা নাছিল ৷
সূৰ্যকুমাৰ যাদৱে থ্ৰ’ডাউন বিশেষজ্ঞ ডি ৰাঘবেন্দ্ৰৰ মুখামুখি হৈছিল আৰু এটা দ্ৰুতবেগী বলে তেওঁৰ হাতৰ সোঁফালৰ আগবাহুত খুন্দা মাৰে ৷ ফলত সূৰ্যকুমাৰ যাদৱে লগে লগে নেট এৰি ফিজিঅ’ কমলেশ আৰু টিম ডাক্তৰক কাষলৈ উভতি আহে ৷ পৰৱৰ্তী সময়ত তেওঁক বৰফৰ পেকেৰে চিকিৎসা কৰা হয় ৷
