স্পৰ্টছ ডেস্ক, ২৩ ছেপ্টেম্বৰ : টীম ইণ্ডিয়াৰ বাবে এক ঈৰ্ষণীয় খিতাপ । বিশ্ব ক্ৰিকেটত এতিয়া একছত্ৰী সম্ৰাট ভাৰতীয় ক্ৰিকেট দল । অষ্ট্ৰেলিয়াৰ বিৰুদ্ধে চলিত এদিনীয়া শৃংখলাৰ প্ৰথমখন মেচত জয়লাভৰ পিছতে টীম ইণ্ডিয়া বিশ্বৰ শীৰ্ষস্থানৰ এদিনীয়া ক্ৰিকেট দল হৈ পৰে । ইয়াৰ ফলস্বৰূপে ক্ৰিকেট ৰেংকিং ইতিহাসত এক বিৰল কৃতিত্ব অৰ্জন কৰে ভাৰতে ।
উল্লেখ্য, অক্টোবৰত ভাৰতত অনুষ্ঠিত হ'ব আইচিচি এদিনীয়া বিশ্বকাপ । ঘৰুৱা মাটিত নিশ্চিতভাৱে ভাৰত হট ফেভাৰিট হৈ আছে । বিশ্বকাপৰ পূৰ্বে অষ্ট্ৰেলিয়াৰ বিৰুদ্ধে এদিনীয়া শৃংখলা ভাৰতৰ বাবে এক সুন্দৰ প্ৰস্তুতি হিচাপেও গণ্য কৰা হৈছে । শুকুৰবাৰে প্ৰথমখন মেচত ভাৰতে অষ্ট্ৰেলিয়াৰ বিৰুদ্ধে ৫ উইকেটত জয়লাভ কৰে । নিশ্চিতভাৱে এই বিজয়ে ভাৰতীয় দলটোৰ মনোবল যথেষ্ট বৃদ্ধি কৰিব । কিন্তু তাতোকৈ ডাঙৰ কথা হৈছে, অষ্ট্ৰেলিয়াৰ বিৰুদ্ধে বিজয় সাব্যস্ত কৰাৰ লগে লগে পুৰুষৰ এদিনীয়া দলৰ ৰেংকিঙৰ তালিকাত ভাৰত শীৰ্ষস্থানত উপনীত হয় ।
ভাৰতে (১১৬ ৰেটিং পইণ্ট) অষ্ট্ৰেলিয়াৰ বিৰুদ্ধে প্ৰথম এদিনীয়াত জয়লাভ কৰাৰ পিছত চিৰপ্ৰতিদ্বন্দ্বী পাকিস্তানক (১১৫) ৰেংকিঙৰ শীৰ্ষস্থানৰ পৰা স্থানচ্যুত কৰে । আনহাতে, ৰেংকিঙত অষ্ট্ৰেলিয়া তৃতীয় স্থানত আছে । কিন্তু শীৰ্ষ দুটা স্থানৰ মাজৰ ব্যৱধান এতিয়া দুই পইণ্ট হ্ৰাস হৈ ১১১-লৈ বৃদ্ধি পাইছে ।
এই জয়ৰ জৰিয়তে বৰ্তমান ভাৰতে ক্ৰিকেটৰ সকলো ফৰ্মেটতে ৰাজত্ব কৰিছে । ইতিমধ্যে টেষ্ট আৰু টি-২০ত শীৰ্ষ স্থান দখল কৰিছে ভাৰতে । ভাৰতে শৃংখলাৰ প্ৰথম এদিনীয়াত অষ্ট্ৰেলিয়াৰ বিৰুদ্ধে পাঁচ উইকেটত বিজয় অৰ্জন কৰি এই কৃতিত্ব অৰ্জন কৰে ৷ উল্লেখ্য যে মেচখনত ভাৰপ্ৰাপ্ত অধিনায়ক কে এল ৰাহুলে টছত জয়ী হৈ প্ৰথমে ফিল্ডিং কৰাৰ সিদ্ধান্ত লয় । মহম্মদ ছামীৰ মোহালিৰ ৰেকৰ্ড সৃষ্টিকাৰী পাঁচ উইকেট দখল আছিল বলিং ইনিংছৰ মুখ্য আকৰ্ষণ ৷ অষ্ট্ৰেলিয়াই ছামীৰ ক্ষুৰধাৰ বলিং আক্ৰমণ আৰু তেওঁৰ সহযোগীসকলৰ পৰা পোৱা উচিত সমৰ্থনৰ বাবে বেটিং সহায়ক উইকেটত নিৰ্ধাৰিত ৫০ অ'ভাৰত আচাইকেইটা উইকেট হেৰুৱাই ২৭৬ ৰাণহে সংগ্ৰহ কৰিবলৈ সক্ষম হয় ।
ইয়াৰ প্ৰত্যুত্তৰত শুভমন গিল আৰু ৰুতুৰাজ গায়কোৱাডে অৰ্ধশতকীয় ইনিংছেৰে অপেনিং যুটিত ১৪২ ৰাণ সংগ্ৰহ কৰে । অৱশ্যে প্ৰথম উইকেটৰ পতনৰ পিছত আৰু দুটা উইকেটৰ শীঘ্ৰে পতন হয় যদিও অধিনায়ক ৰাহুল আৰু সূৰ্যকুমাৰ যাদৱৰ অৰ্ধশতকে মেচখনক সহজ জয়ৰ দিশে আগবঢ়াই লৈ যায় । এবছৰ পিছত নিজৰ এদিনীয়া কেৰিয়াৰৰ প্ৰথমটো অৰ্ধশতক অৰ্জন কৰি সূৰ্যকুমাৰ পেভিলিয়নমুখী হয় যদিও ৰাহুল আৰু জাদেজাই ভাৰতক বিজৰয় সোৱাদ প্ৰদান কৰে ।
উল্লেখ্য যে শেহতীয়াকৈ সমাপ্ত হোৱা এছিয়া কাপ আৰু দক্ষিণ আফ্ৰিকাৰ বিৰুদ্ধে অষ্ট্ৰেলিয়াৰ এদিনীয়া শৃংখলাৰ সময়ত ভাৰত, পাকিস্তান আৰু অষ্ট্ৰেলিয়া তিনিওটা দলেই শীৰ্ষস্থানৰ যুঁজত আছিল ।
এছিয়া কাপৰ ফাইনেলত প্ৰৱেশ নকৰা স্বত্বেও পাকিস্তানে তেওঁলোকৰ নম্বৰ ১ স্থান ধৰি ৰাখিছিল। ভাৰত আৰু অষ্ট্ৰেলিয়া দুয়োটাই এছিয়া কাপ আৰু দক্ষিণ আফ্ৰিকা শৃংখলাৰ সময়ত এদিনীয়া সন্মিলনত উপনীত হোৱাৰ সুযোগ পাইছিল কিন্তু যেতিয়া ই গুৰুত্বপূৰ্ণ আছিল তেতিয়া খেলহে হেৰুৱাইছিল।
আনহাতে, এই পৰাজয়ৰ পিছত অষ্ট্ৰেলিয়াই বিশ্বকাপৰ পূৰ্বে শীৰ্ষস্থানলৈ উন্নীত হোৱাৰ কোনো সম্ভাৱনা নাই । অৱশ্যে যদি অষ্ট্ৰেলিয়াই বাকী থকা দুখন মেচত যদি জয়লাভ কৰে, তেন্তে পাকিস্তান পুনৰ শীৰ্ষস্থানত উপনীত হ'ব পাৰে ।
ভাৰতৰ আধিপত্য বৰ্তমান ক্ৰিকেটৰ আটাইকেইটা ফৰ্মেটতে । মেন ইন ব্লুৱে ইতিমধ্যে টেষ্ট আৰু টি-২০ত শীৰ্ষস্থান দখল কৰিছে । পুৰুষৰ ক্ৰিকেট ইতিহাসত এইটো কেৱল দ্বিতীয়বাৰৰ বাবে ঘটিছে যে কোনো এটা দলে আটাইকেইটা ফৰ্মেটতে শীৰ্ষ ৰেংকিং অৰ্জন কৰিছে । ইয়াৰ পূৰ্বে কেৱল দক্ষিণ আফ্ৰিকাই ২০১২ চনৰ আগষ্টত এই কৃতিত্ব অৰ্জন কৰিছিল ।
আনহাতে, পাঁচদিনীয়া ফৰ্মেটত ভাৰতে উল্লেখনীয় ধাৰাবাহিকতা প্ৰদৰ্শন কৰিছে । যাৰ ফলস্বৰূপে টীম ইণ্ডিয়াই বিগত জুনত একেৰাহে দ্বিতীয়বাৰ বিশ্ব টেষ্ট চেম্পিয়নশ্বিপৰ ফাইনেলত প্ৰৱেশ কৰে । অৱশ্যে চূড়ান্ত লক্ষ্যত উপনীত হোৱাত পুনৰবাৰ ব্যৰ্থ হয় ভাৰত । ইয়াৰ উপৰি দ্বিপাক্ষিক শৃংখলাত ভাৰতৰ শেহতীয়া অভিলেখ প্ৰায় নিষ্কলঙ্ক । ইয়াৰ বিপৰীতে ২০২১-২২ বৰ্ষত দক্ষিণ আফ্ৰিকাৰ বিৰুদ্ধে শৃংখলাৰ পৰাজয় হৈছে একমাত্ৰ কলঙ্ক ।
ইয়াৰ উপৰি টি-২০ত ভাৰতে ২০২২ চনত টি-২০ বিশ্বকাপৰ ছেমি ফাইনেলত উপনীত হয় । আনহাতে, দ্বিপাক্ষিক টি-২০ শৃংখলাত ভাৰতৰ প্ৰদৰ্শন অধিক আকৰ্ষণীয় । টি-২০ বিশ্বকাপৰ ২০২১ সংস্কৰণৰ পৰা ১৪ টা শৃংখলাৰ ভিতৰত মাত্ৰ এটা শৃংখলা হেৰুৱাইছে ভাৰতে ।
লগতে পঢ়ক :India vs Australia 1st ODI : প্ৰথম এদিনীয়াত অষ্ট্ৰেলিয়াৰ বিৰুদ্ধে 5 উইকেটত জয়লাভ ভাৰতৰ
