স্পৰ্টছ ডেস্ক, 5 এপ্ৰিল : দক্ষিণ আফ্ৰিকা আৰু পাকিস্তানৰ মাজত চলি থকা 3 খনীয়া এদিনীয়া ক্ৰিকেট শৃংখলাত 1-1 ত সমতা স্থাপন কৰিছে দুয়োটা দলে ৷ দেওবাৰে জোহান্সবাৰ্গত হোৱা দ্বিতীয়খন এদিনীয়াত পাকিস্তানৰ বিৰুদ্ধে 17 ৰানত বিজয় সাব্যস্ত কৰি সমতা স্থাপন কৰে দক্ষিণ আফ্ৰিকাই ৷ দক্ষিণ আফ্ৰিকাই 50 অভাৰত 6 উইকেটৰ বিনিয়মত 342 ৰানৰ সীমা বান্ধি দিয়ে পাকিস্তানৰ বিৰুদ্ধে ৷
পাকিস্তানৰ অ'পেনাৰ ফখৰ জামানৰ আক্ৰমণাত্মক বেটিঙে দক্ষিণ আফ্ৰিকাৰ বিৰুদ্ধে প্ৰত্যাহ্বান সৃষ্টি কৰিছিল ৷ কিন্তু ফখৰ জামানৰ দূৰ্দান্ত বেটিঙে দলটোক জয়ৰ মুখ দেখুৱাব নোৱাৰিলে ৷ 155 টা বলত 18 টা চাৰি আৰু 10 ছয়ৰে পাকিস্তানৰ বাবে 193 ৰানৰ বৰঙণি আগবঢ়াই ফখৰ জামানে ৷ পাকিস্তানে 50 অভাৰত 9 টা উইকেটৰ বিনিময়ত 324 ৰানহে কৰিবলৈ সক্ষম হয় ৷
ইফালে, প্ৰথমৰ পৰাই আক্ৰমণাত্মক হৈ পৰে দক্ষিণ আফ্ৰিকা দলটো ৷ কুইন্টন ডি ক'কে 86 টা বলত 80 ৰান আৰু টেম্বা বেভুমাই 102 টা বলত 92 ৰানৰ বৰঙণি আগবঢ়ায় ৷
লগতে পঢ়ক: ভাৰতৰ প্ৰথম মহিলা ক্ৰিকেট ধাৰাভাষ্যকাৰ চন্দ্ৰা নাইডুৰ দেহাৱসান
