স্পৰ্টছ ডেস্ক, 24 জুনঃ আগন্তুক এছিয়া কাপক লৈ পাকিস্তান ক্ৰিকেট ব'ৰ্ডৰ মুখ্য় কাৰ্যবাহী বিষয়া ৱাছিম খানৰ গুৰুত্বপূৰ্ণ মন্তব্য় । নিৰ্ধাৰিত কাৰ্যসূচী অনুসৰিয়ে এই বৰ্ষত শ্ৰীলংকা অথবা সংযুক্ত আৰৱ আমিৰাটত আয়োজন কৰা হ'ব এছিয়া কাপ ।
ৱাছিম খানে এছিয়া কাপৰ আয়োজনৰ সকলো অনিশ্চয়তাৰ খবৰক খণ্ডন কৰি এই প্ৰতিক্ৰিয়া প্ৰকাশ কৰিছে । আইপিএলৰ বাবেই এছিয়া কাপ বাতিল কৰা হ'ব বুলি সৰ্বত্ৰে এক চৰ্চা চলিছিল । কিন্তু সংবাদমাধ্যমৰ আগত পাকিস্তান ক্ৰিকেট ব'ৰ্ডৰ মুখ্য় কাৰ্যবাহী বিষয়াগৰাকীয়ে কয়, "এছিয়া কাপৰ আয়োজন হ'ব । ইংলেণ্ডৰ পৰা পাকিস্তান দলৰ প্ৰত্যাৱৰ্তনৰ পাচতেই ছেপ্তেম্বৰ অথবা অক্টোবৰ মাহতেই এই প্ৰতিযোগিতাৰ আয়োজন কৰা হ'ব পাৰে ।"
তেওঁ লগতে কয়, কিছু কথা সঠিক সময়ত হে স্পষ্ট হৈ উঠিব । আমি আশা কৰিছো শ্ৰীলংকাত আয়োজন কৰা হ'ব এছিয়া কাপ । কাৰণ শ্ৰীলংকাত কৰ'ণা ভাইৰাছৰ সংক্ৰমণৰ প্ৰকোপ অধিক নহয় । যদি শ্ৰীলংকাত নহয় তেন্তে সংযুক্ত আৰৱ আমিৰাটতো আয়োজনৰ বাবে সাজু আছে ।
উল্লেখ্য় যে, এই বৰ্ষৰ এছিয়া কাপৰ আয়োজক হৈছে পাকিস্তান । কিন্তু পাকিস্তানত কৰ'ণা ভাইৰাছৰ অধিক সংক্ৰমণৰ ফলতেই অন্য় ঠাইত ইয়াৰ আয়োজনৰ বিকল্প বিচাৰি থকা হৈছে । আনহাতে ভাৰত-পাকিস্তান শৃংখলাৰ সম্ভাৱনাৰ কথা খাৰিজ কৰে ৱাছিম খানে ।
