চিটাৰা ডেস্ক, 19 ছেপ্তেম্বৰ : আজি অসমীয়া বোলছবি জগতৰ জনপ্ৰিয় অভিনেতা ৰবি শৰ্মাৰ জন্মদিন ৷ মুনিন বৰুৱা পৰিচালিত ‘হিয়া দিয়া নিয়া’ ছবিখনেৰে বোলছবি জগতত প্ৰৱেশ কৰা ৰবি শৰ্মাৰ জন্ম হৈছিল 1972 চনৰ 19 ছেপ্তেম্বৰত ৷ তেওঁৰ পিতৃৰ ঘৰ নলবাৰীত ৷
ৰবি শৰ্মাই উলুবাৰী DAV বিদ্যালয় আৰু ফেকাল্টি হাইস্কুলৰ পৰা স্কুলীয়া শিক্ষা গ্ৰহণ কৰিছিল ৷ ইয়াৰ পিছত তেওঁ কটন মহাবিদ্যালয়ৰ পৰা উচ্চতৰ মাধ্যমিক আৰু গুৱাহাটীৰ আৰ্য বিদ্যাপীঠ মহাবিদ্যালয়ৰ পৰা স্নাতক ডিগ্ৰী লাভ কৰে ৷
ৰবি শৰ্মাৰ মাতৃ বন্দনা শৰ্মাও আছিল অসমীয়া চলচ্চিত্ৰ জগতৰ এগৰাকী অভিনেত্ৰী ৷
কেৰিয়াৰৰ প্ৰথমখন ছবি ‘হিয়া দিয়া নিয়া’ত কৰা অভিনয়েৰে দৰ্শকৰ মন জয় কৰিবলৈ সক্ষম হোৱা ৰবি শৰ্মাই আৰু পিছলৈ উভতি চাবলগীয়া হোৱা নাই ৷ 2001 চনত তেওঁ মুনীন বৰুৱাৰ ‘নায়ক’ ছবিখনত অভিনয় কৰাৰ লগতে একেটা বছৰতে মনোজ বৰুৱাৰ ‘অন্য এক যাত্ৰা’ ছবিখনতো অভিনয় কৰে ৷
ৰবি শৰ্মাই অভিনয় কৰা কেইখনমান জনপ্ৰিয় ছবি হ’ল- ‘সৰু বোৱাৰী’, ‘বুকুৱে বিচাৰে’, ‘বাৰুদ’, ‘অনুৰাগ’, ‘হিয়াৰ দাপোণত তোমাৰেই ছবি’, ‘জীৱন তৃষ্ণা’, ‘দেউতা দিয়া বিদায়’, ‘ৰণাংগন’ ৷ ইয়াৰ উপৰিও তেওঁ এখন অসমীয়া ৱেব চিৰিজ ‘Illegal’ তো অভিনয় কৰিছে ৷
ৰবি শৰ্মাই 2019 চনৰ 2 আগষ্টত ভাৰতীয় জনতা পাৰ্টীত যোগদান কৰিছিল যদিও নাগৰিকত্ব সংশোধনী আইনৰ বিৰুদ্ধে থিয় দিবলৈ তেওঁ দলৰ সদস্য পদৰ পৰা পদত্যাগ কৰে ৷ সম্প্ৰতি তেওঁ নিজৰ আহিবলগীয়া ছবি ‘ৰঘুপতি’ৰ কামত ব্যস্ত হৈ থকা দেখা গৈছে ৷
লগতে পঢ়ক : ইটিভি ভাৰতৰে অভিনেতা ৰবি শৰ্মাৰ বিশেষ সাক্ষাৎকাৰ...
