গুৱাহাটী ৰেলৱে ষ্টেচনৰ পৰা কানিসহ গ্ৰেপ্তাৰ দুই মহিলা

অপৰাধীৰ ৰম্যভূমিলৈ পৰিণত হোৱা গুৱাহাটী মহানগৰীত অব্যাহত আছে অবৈধ নিচাজাতীয় সামগ্ৰীৰ সৰবৰাহ ৷ বিগত সময়চোৱা নিৰাপত্তা বাহিনীৰ লগতে ৰেল আৰক্ষীৰ সজাগতাৰ বাবে গুৱাহাটীৰ পৰা জব্দ হৈছে কোটি টকা মূল্যৰ নিচাজাতীয় সামগ্ৰী ৷ শেহতীয়াকৈ বুধবাৰে পুনৰ গুৱাহাটী ৰেলৱে ষ্টেচনৰ পৰা চৰকাৰী ৰেল আৰক্ষীয়ে নিচাজাতীয় সামগ্ৰীসহ গ্ৰেপ্তাৰ কৰে দুগৰাকী মহিলা ৷

গুৱাহাটী, 20 নৱেম্বৰঃ অপৰাধীৰ ৰম্যভূমিলৈ পৰিণত হোৱা মহানগৰীক চোৰাং সামগ্ৰী সৰবৰাহৰ বাবে ঘাটি হিচাপে বাচি লৈছে একাংশ দুষ্কৃতিকাৰীয়ে ৷ বিগত সময়চোৱাত গুৱাহাটী ৰেলৱে ষ্টেচনক চোৰাং সামগ্ৰী সৰবৰাহৰ হট স্পট হিচাপে বাচি লৈ চলাই আহিছে অবৈধ তথা চোৰাং সামগ্ৰীৰ সৰবৰাহ ৷ কিন্তু ৰেল আৰক্ষীৰ লগতে নিৰাপত্তা বাহিনীৰ তৎপৰতাত বহুটো সময়ত এনেকুৱা চক্ৰৰ ঘাটি উচ্ছেদ হৈ আহিছে ৷

বুধবাৰে পুনৰ গুৱাহাটী ৰেল ষ্টেচনৰ পৰা জব্দ হয় অবৈধ নিচাজাতীয় সামগ্ৰী ৷ ডিমাপুৰৰ পৰা দিল্লী অভিমুখী নামনিমুৱা ব্ৰহ্মপুত্ৰ মেইলৰ এটা দবাৰ পৰা ৰেল আৰক্ষীয়ে নিচাজাতীয় কানিসহ গ্ৰেপ্তাৰ কৰে দুগৰাকী মহিলাক ৷ ৰেলগাড়ীখনৰ B1 দবাৰ 61 আৰু 62 নম্বৰ আসনৰ পৰা আৰক্ষীয়ে দুয়োগৰাকী মহিলাক গ্ৰেপ্তাৰ কৰাৰ লগতে তেওঁলোকৰ পৰা জব্দ কৰে কানিখিনি ৷

মহিলা দুগৰাকীৰ পৰা প্ৰায় 3 কিলোগ্ৰাম কানি জব্দ কৰাৰ লগতে ইয়াৰ বজাৰ মূল্য 7 লাখ টকা হ'ব বুলি প্ৰকাশ কৰিছে ৰেল আৰক্ষী বিষয়া ৰঞ্জিত দাসে ৷ ধৃত মহিলাদুগৰাকী মণিপুৰৰ ইম্ফলৰ কুসুম প্ৰধান আৰু গীত পাইডেল বুলি জানিব পৰা গৈছে ৷ ইতিমধ্যে দুয়োগৰাকী মহিলাক আৰক্ষীয়ে সোধা-পোচা চলাই আছে ৷

লগতে পঢ়কঃ গুৱাহাটীত ডকাইতে কাঢ়ি নিলে ৯ লাখ টকা