পাঠশালা,10 অক্টোবৰ: বজালীৰ সৰুপেটাত শনিবাৰে দুপৰীয়া আৰক্ষীয়ে নিয়মীয়া অভিযানত জব্দ কৰে 2.24 কিল’গ্ৰাম ওজনৰ এখন সোণৰ নাও ৷ সৰুপেটা আৰক্ষী থানাৰ বিষয়া নয়নজ্যোতি ডেকাৰ নেতৃত্বত চলা এক অভিযানত আৰক্ষীৰ এটা দলে শনিবাৰে চহৰখনৰ মাজমজিয়াস্থিত পঞ্জাৱ নেশ্যনেল বেংকৰ সমুখত এখন সন্দেহজনক এল্ট’ বাহন দেখি ৰাখিবলৈ নিৰ্দেশ দিছিল ৷
কিন্তু হঠাৎ সন্মুখত আৰক্ষীক দেখি বাহনৰ ভিতৰত থকা আৰোহী তিনিজনে পলাই যাব বিচৰাত আৰক্ষীয়ে বলপূৰ্বকভাৱে বাহনখন ৰখাবলৈ বাধ্য হয় ৷ তাৰপিছত আৰক্ষীয়ে বাহনখনত তালাচী চলাই উদ্ধাৰ কৰিবলৈ সক্ষম হয় লুকুৱাই অনা এখন সোণৰ নাওৰ লগতে এখন ডেগাৰ সহ পাঁচটাকৈ ৰূপৰ আঙুঠি ৷ ঘটনা প্ৰসংগত আৰক্ষীয়ে বাহনখনত অহা তিনি যুৱক ক্ৰমে নুৰজামাল হুছেইন, আবু হানিফ আৰু ৰাজদুল হকক আটক কৰিছে ৷ আটকাধীন যুৱক তিনিজন লখিমপুৰৰ পৰা অহা বুলি আৰক্ষীয়ে সদৰী কৰিছে যদিও বাকী বিষয় প্ৰসংগত মুখ খোলাৰ পৰা বিৰত থাকে আৰক্ষী ৷
লগতে চাওকঃ বানৰ পিচত ঠন ধৰা ধাননি ডৰা দেখি উৎফুল্লিত মৰিগাঁৱৰ কৃষক
