ইণ্টাৰনেশ্যনেল ডেস্ক,২৬ নৱেম্বৰ : ২০২৪ চনত আমেৰিকাৰ ৰাষ্ট্ৰপতি পদৰ নিৰ্বাচন অনুষ্ঠিত হ'ব । যাৰ বাবে দেশখনত সম্ভাব্য প্ৰাৰ্থীসকলে প্ৰচাৰ অব্যাহত ৰাখিছে । ইফালে ৰিপাব্লিকান দলৰ পৰা মনোনয়নৰ দৌৰত আছে প্ৰাক্তন ৰাষ্ট্ৰপতি ড'নাল্ড ট্ৰাম্প । একেটা দলৰ পৰাই কেইবাজনো প্ৰাৰ্থীয়ে ৰাষ্ট্ৰপতি পদৰ বাবে মনোনয়নৰ কুচকাৱাজ চলাই আছে । তাৰ ভিতৰত অন্যতম ভাৰতীয়মূলৰ নিকি হেলী ।
দলৰ ৰাষ্ট্ৰপতি পদৰ মনোনয়নৰ বাবে বিশেষকৈ মূল প্ৰতিযোগিতা ট্ৰাম্প আৰু দক্ষিণ কেৰোলিনাৰ প্ৰাক্তন গৱৰ্ণৰ হেলীৰ মাজতে হ'ব যেন অনুমান হৈছে । যাৰ বাবে দুয়ো পৃথকে পৃথকে ভোটাৰক আকৰ্ষণৰ বাবে চেষ্টা চলাইছে । এইবাৰ নিকি হেলীয়ে অধ্যয়ন কৰা মহাবিদ্যালয়ক টাৰ্গেট কৰি ল'লে ট্ৰাম্পে । কলম্বিয়াৰ মহাবিদ্যালয় ফুটবল প্ৰতিযোগিতাত উপস্থিত থাকি হেলীৰ গৃহ সমষ্টিতে তেওঁক পৰাস্ত কৰাৰ কৌশল গ্ৰহণ কৰে ট্ৰাম্পে ।
প্ৰাক্তন ৰাষ্ট্ৰপতি তথা ২০২৪ চনৰ ৰিপাব্লিকান দলৰ মনোনয়নৰ বাবে বৰ্তমান তালিকাৰ শীৰ্ষত থকা ট্ৰাম্পে শনিবাৰে নিশা কলম্বিয়াৰ উইলিয়ামছ-ব্ৰাইচ ষ্টেডিয়ামত উপস্থিত হয় । য'ত অঞ্চলটোৰ আৰু বছৰটোৰ আটাইতকৈ বৃহৎ ক্ৰীড়া প্ৰতিযোগিতা অনুষ্ঠিত হয় । অনুষ্ঠানত একাংশ সমৰ্থকে ট্ৰাম্পৰ নাম চিঞৰি তেওঁক আগন্তুক নিৰ্বাচনৰ বাবে সমৰ্থন কৰাৰ ইংগিত দিয়ে । লক্ষণীয়ভাৱে দুবাৰকৈ দক্ষিণ কেৰোলিনাৰ গভৰ্ণৰ নিৰ্বাচিত হোৱা ক্লেমছনৰ প্ৰাক্তন ছাত্ৰী তথা ট্ৰাষ্টী নিকি হেলী এই কাৰ্যসূচীত উপস্থিত নাছিল ।
হেলীৰ পাছত নিৰ্বাচিত হোৱা গৱৰ্ণৰ হেনৰী মেকমাষ্টাৰৰ আহ্বানত ট্ৰাম্প সেই অনুষ্ঠানত উপস্থিত থাকে । একাংশ সমৰ্থকৰ মাজেৰে গৈ বিশেষ অনুষ্ঠানত উপস্থিত হোৱা ট্ৰাম্পৰ সৈতে দক্ষিণ কেৰোলিনাৰ জ্যেষ্ঠ আমেৰিকাৰ চিনেটৰ লিণ্ডচে গ্ৰাহামো উপস্থিত থাকে ।
২০১৭ চনত যেতিয়া ট্ৰাম্পে হেলীক ৰাষ্ট্ৰসংঘৰ ৰাষ্ট্ৰদূত হিচাপে নিযুক্তি দিছিল তেতিয়া মেকমাষ্টাৰ গৱৰ্ণৰ হৈছিল । গ্ৰাহাম আৰু হেলী বহু বছৰ ধৰি সহযোগী আছিল । কিন্তু মেকমাষ্টাৰ আৰু গ্ৰাহাম দুয়োগৰাকীয়ে এতিয়া ট্ৰাম্পক সমৰ্থন কৰে । যাৰ বাবে প্ৰাক্তন ৰাষ্ট্ৰপতি ট্ৰাম্পে ৰিপাব্লিকান দলৰ প্ৰাথমিক ভোটাৰসকলৰ ব্যাপক সমৰ্থন লাভ কৰাৰ সম্ভাৱনা আছে ।
লক্ষণীয়ভাৱে ক্ৰীড়া প্ৰতিযোগিতাত উপস্থিত হোৱাৰ কেইঘণ্টামান পূৰ্বে ট্ৰাম্পে প্ৰচাৰ অভিযানৰ ঘোষণা কৰি কৈছিল যে তেওঁ সকলো বিৰোধী প্ৰাৰ্থীৰ তুলনাত দক্ষিণ কেৰোলিনাৰ বিধায়কৰ অধিক সমৰ্থন লাভ কৰিছে । তাৰ ভিতৰত আছে আমেৰিকাৰ চিনেটৰ টিম স্কটক সমৰ্থন কৰা ৬ জন ৰাজ্যিক আইন প্ৰণেতাৰ সমৰ্থন ।
ইফালে কলম্বিয়া ভ্ৰমণ ট্ৰাম্পৰ প্ৰথম লক্ষ্য আছিল । শনিবাৰে আবেলি ষ্টেডিয়ামৰ চাৰিওফালে আৰু ৰাজধানী চহৰ কলম্বিয়াৰ বিভিন্ন প্ৰান্তত থকা বহু ইলেক্ট্ৰনিক হৰ্ডিংবোৰতো ট্ৰাম্পক আদৰণি জনোৱা দেখা গৈছিল । ট্ৰাম্পৰ ২০২০ চনৰ নিৰ্বাচনত পৰাজয় আৰু তেওঁৰ বিচৰাধীন গোচৰৰ বিষয়ে উল্লেখ কৰি হৰ্ডিংবোৰত বিশেষ বাৰ্তা উপস্থাপন কৰা হৈছিল ।
ষ্টেডিয়ামৰ ওচৰত কিছুমান বিক্ৰেতাই পূৰ্বৰ নিৰ্বাচনৰ সামগ্ৰী যেনে 'ট্ৰাম্প ২০২০' পতাকাসহ ট্ৰাম্পৰ সৈতে সম্পৰ্ক থকা সামগ্ৰীবোৰ বিক্ৰীৰ বাবে অনা দেখা গৈছিল । ট্ৰাম্পৰ আগমনৰ পূৰ্বে ষ্টেডিয়ামত প্ৰৱেশ কৰা কিছুমান অনুৰাগীয়ে 'আহক ব্ৰেণ্ডন !' বুলি শ্ল'গান দিয়াও দেখা গৈছিল ।
লগতে পঢ়ক :জটিল কূটনৈতিক পৰিস্থিতিত গোলকীয় সংঘাতৰ সম্ভাৱ্য মধ্যস্থতাকাৰী হৈছে ভাৰত : ৰুচিৰা কম্বোজ
