ইণ্টাৰনেশ্যনেল ডেস্ক,২ ডিচেম্বৰ : এসপ্তাহ পূৰ্বে উত্তৰ কোৰিয়াই গুপ্তচৰ উপগ্ৰহ কক্ষপথত স্থাপন কৰা বুলি দাবী কৰিছিল । তাৰ পাছতে দক্ষিণ কোৰিয়াইও সামৰিক গুপ্তচৰ উপগ্ৰহ উৎক্ষেপণৰ দাবী কৰিছে । দক্ষিণ কোৰিয়াই শুকুৰবাৰে প্ৰথমবাৰৰ বাবে সামৰিক গুপ্তচৰ উপগ্ৰহ উৎক্ষেপণ কৰে । যাক লৈ দুয়োখন দেশৰ মাজত উত্তেজনাও বৃদ্ধি পাইছে । দক্ষিণ কোৰিয়াই স্পেচএক্সৰ ফালকন ৯ ৰকেট ব্যৱহাৰ কৰি কেলিফৰ্ণিয়াৰ ভাণ্ডেনবাৰ্গ মহাকাশ ঘাটিৰ পৰা উপগ্ৰহটো উৎক্ষেপণ কৰিছে বুলি জানিব পৰা গৈছে ।
দক্ষিণ কোৰিয়াই স্পেচএক্সৰ সৈতে এই সন্দৰ্ভত চুক্তি কৰিছিল । সেই চুক্তিৰ অধীনত ২০২৫ চনৰ ভিতৰত মহাকাশলৈ ৫ টা গুপ্তচৰ উপগ্ৰহৰ প্ৰেৰণ কৰাৰ পৰিকল্পনা কৰা হৈছে । তাৰ ভিতৰত এইটো প্ৰথম উপগ্ৰহ । উৎক্ষেপণৰ পৰিকল্পনা এই সপ্তাহৰ আৰম্ভণিতে নিৰ্ধাৰণ কৰা হৈছিল কিন্তু বতৰৰ পৰিস্থিতিৰ বাবে পিছুৱাই দিয়া হৈছিল । উল্লেখ্য যে মহাকাশত দক্ষিণ কোৰিয়াৰ নিজা কোনো সামৰিক গুপ্তচৰ উপগ্ৰহ নাই আৰু উত্তৰ কোৰিয়াৰ গতিবিধি নিৰীক্ষণ কৰিবলৈ আংশিকভাৱে আমেৰিকাৰ গুপ্তচৰ উপগ্ৰহ ব্যৱহাৰ কৰি আহিছে দক্ষিণ কোৰিয়াই ।
দক্ষিণ কোৰিয়াৰ এই গুপ্তচৰ উপগ্ৰহই উত্তৰ কোৰিয়াৰ বিৰুদ্ধে দেশখনৰ প্ৰতিৰক্ষা যথেষ্ট উন্নত কৰিব বুলি আশা কৰা হৈছে । এই বছৰৰ আৰম্ভণিতে দুটা উপগ্ৰহ উৎক্ষেপণ বিফল হোৱাৰ পাছত উত্তৰ কোৰিয়াই শেহতীয়াকৈ কৈছিল যে তেওঁলোকে যোৱা সপ্তাহত মালিগয়ং-১ গুপ্তচৰ উপগ্ৰহটো সফলতাৰে কক্ষপথত স্থাপন কৰিছে । ইফালে দক্ষিণ কোৰিয়াইও নিশ্চিত কৰিছে যে উপগ্ৰহটো কক্ষপথত প্ৰৱেশ কৰিছে । কিন্তু বিষয়াসকলে কোৱা মতে ই সঠিকভাৱে কাম কৰি আছে নে নাই সেয়া পৰীক্ষা কৰিবলৈ তেওঁলোকক অধিক সময়ৰ প্ৰয়োজন হ'ব ।
উত্তৰ কোৰিয়াই মঙলবাৰে কয় যে মালিগয়ং-১ উপগ্ৰহই হোৱাইট হাউচ আৰু ৱাশ্বিংটনৰ পেন্টাগন আৰু ভাৰ্জিনিয়াৰ এটা নৌ সেনা ঘাটি আৰু শিপইয়ৰ্ডত আমেৰিকাৰ বিমান বাহকৰ তোলা ফটোসমূহ নেতা কিম জং উনে পৰ্যালোচনা কৰি আছে ।
অৱশ্যে উত্তৰ কোৰিয়াই এতিয়ালৈকে সেই ফটোবোৰ মুকলি কৰা নাই । উপগ্ৰহটোৱে হাই-ৰিজলিউশ্বন ছবি প্ৰেৰণ কৰিব পাৰে নে, সঠিক সামৰিক অনুসন্ধান কৰিব পাৰে সেই বিষয়ে সন্দেহ প্ৰকাশ কৰিছে । ইফালে ৰাষ্ট্ৰসংঘৰ নিৰাপত্তা পৰিষদে কেইবাটাও প্ৰস্তাৱত উত্তৰ কোৰিয়াৰ দ্বাৰা যিকোনো উপগ্ৰহ উৎক্ষেপণ নিষিদ্ধ কৰা হৈছে । ইয়াৰ প্ৰত্যুত্তৰত উত্তৰ কোৰিয়াই কৈছে যে আমেৰিকাৰ বৰ্ধিত শত্ৰুতাৰ প্ৰতিৰোধ কৰিবলৈ এক গুপ্তচৰ উপগ্ৰহ উৎক্ষেপণ কৰাৰ সাৰ্বভৌম অধিকাৰ আছে ।
লগতে পঢ়ক :যুদ্ধবিৰতি সমাপ্ত; গাজাত ইজৰাইলৰ আক্ৰমণত নিহত ১৭৮
