নিউজ ডেস্ক, ২৩ আগষ্ট : ১৫ সংখ্যক ব্ৰিকছ সন্মিলনত অংশগ্ৰহণ কৰিবলৈ দক্ষিণ আফ্ৰিকাত উপস্থিত হোৱা প্ৰধানমন্ত্ৰী নৰেন্দ্ৰ মোদীয়ে দেশৰ চন্দ্ৰযান-৩-ৰ অংশ হিচাপে ঐতিহাসিক চন্দ্ৰ অৱতৰণৰ ভাৰ্চুৱেলী সাক্ষী হ'ব । ভাৰতীয় মহাকাশ গৱেষণা সংস্থাৰ (ইছৰো) মতে, চন্দ্ৰযান-৩ চন্দ্ৰৰ অজ্ঞাত দক্ষিণ মেৰুত অৱতৰণ কৰি ইতিহাস সৃষ্টি কৰিবলৈ সাজু হৈছে ।
ভাৰতীয় সময় অনুসৰি সন্ধিয়া ৬.০৪ বজাত চন্দ্ৰযান-৩-ৰ ছফ্ট-লেণ্ডিং মসৃণ অৱতৰণৰ বাবে প্ৰচেষ্টা চলোৱা হ'ব । আনহাতে, বুধবাৰে চন্দ্ৰ অৱতৰণৰ প্ৰচেষ্টাৰ পূৰ্বে সমগ্ৰ বিশ্বৰ পৰা শুভেচ্ছা আহিছে । লণ্ডনৰ উক্সব্ৰিজত ভাৰতীয় শিক্ষাৰ্থী আৰু গৱেষণা পণ্ডিতসকলে চন্দ্ৰযান-৩-ৰ সফল অৱতৰণৰ বাবে আদ্য শক্তি মাতাজী মন্দিৰত এক বিশেষ প্ৰাৰ্থনাৰ আয়োজন কৰে ।
ইফালে চন্দ্ৰযান-৩-ৰ সফল অৱতৰণৰ বাবে আমেৰিকা যুক্তৰাষ্ট্ৰৰ ভাৰ্জিনিয়াৰ এটা মন্দিৰত প্ৰবাসী ভাৰতীয় সদস্যসকলে যজ্ঞ অনুষ্ঠিত কৰে । উল্লেখ্য যে, সমগ্ৰ বিশ্বতে ইছৰোৰ চন্দ্ৰ অৱতৰণৰ প্ৰচেষ্টাক কেন্দ্ৰ কৰি প্ৰত্যাশাৰ সৃষ্টি হৈছে । আনহাতে, এই ঐতিহাসিক মুহূৰ্তৰ পূৰ্বে সমগ্ৰ দেশতে প্ৰাৰ্থনা অনুষ্ঠিত কৰা হৈছে । ভাৰতৰ তৃতীয় চন্দ্ৰ অভিযানৰ ঐতিহাসিক মুহূৰ্তৰ পূৰ্বে ঋষিকেশত এক গংগা আৰতি সম্পন্ন কৰা হয় ।
ভুৱনেশ্বৰ, বাৰাণসী আৰু প্ৰয়াগৰাজত ভক্তৰ এটা দলে পূজা সম্পন্ন কৰে আৰু বিক্ৰম লেণ্ডাৰৰ সফল অৱতৰণৰ বাবে প্ৰাৰ্থনা কৰে । ভদোদৰাৰ শিশুসকলেও চন্দ্ৰযান-৩-ৰ সুৰক্ষিত অৱতৰণৰ বাবে প্ৰাৰ্থনা কৰে । ভাৰতৰ চন্দ্ৰ অভিযানৰ সফলতাৰ বাবে ইছলামিক চেণ্টাৰ অৱ ইণ্ডিয়াত বিশেষ নামাজ পঢ়া হয় ।
উল্লেখ্য যে, বুধবাৰে সন্ধিয়া ৫.২০ বজাৰ পৰা ইছৰোৰ চন্দ্ৰ অৱতৰণ কাৰ্যৰ পোনপটীয়া সম্প্ৰচাৰ আৰম্ভ হ'ব । অৱতৰণৰ পোনপটীয়া সম্প্ৰচাৰৰ কাৰ্যীসূচীসমূহ ২৩ আগষ্টত ভাৰতীয় সময় অনুসৰি সন্ধিয়া ৫.২৭ বজাৰ পৰা ইছৰো ৱেবছাইট, ইউটিউব চেনেল, ফেচবুক আৰু ৰাজহুৱা সম্প্ৰচাৰক ডিডি নেচনেল টিভিত উপলব্ধ হ'ব ।
উল্লেখযোগ্য যে, আমেৰিকা যুক্তৰাষ্ট্ৰ, ৰাছিয়া আৰু চীনৰ পিছত এই কৃতিত্ব অৰ্জন কৰা ভাৰত হ'ব বিশ্বৰ চতুৰ্থখন দেশ । আনহাতে, চন্দ্ৰৰ দক্ষিণ মেৰুত অৱতৰণ কৰা বিশ্বৰ একমাত্ৰ দেশ হ'ব ভাৰত । চন্দ্ৰযান-৩-ৰ লেণ্ডাৰ মডিউল (এলএম) লেণ্ডাৰ বিক্ৰম আৰু ৰ'ভাৰ প্ৰজ্ঞানে চন্দ্ৰৰ দক্ষিণ মেৰুৰ ওচৰত এক মসৃণ স্পৰ্শ কৰাৰ পৰিকল্পনা কৰা হৈছে ।
লগতে পঢ়ক :Chandrayaan-3 soft-landing: জোনবাইৰ বুকুত ইতিহাস ৰচিবলৈ সাজু ভাৰত; দেশবাসী হ’ব বিৰল মূহুৰ্তৰ সাক্ষী
