চিটাৰা ডেস্ক, 16 জুন: শুকুৰবাৰে (১৬ জুন) মুক্তি লাভ কৰিছে প্ৰভাসৰ অভিনীত ছবি ‘আদিপুৰুষ’। কিন্তু ছবিখন চোৱাৰ পিচত একাংশই প্ৰশংসা কৰাৰ বিপৰীতে একাংশই এই ছবিখনক তীব্ৰ ভাৱে সমালোচনা কৰিছে ৷ ইফালে হায়দৰাবাদৰ অনুৰাগীয়ে ছবিখনৰ সমালোচনা কৰা এজন ব্যক্তিক ৰাজহুৱা ভাৱে প্ৰহাৰ কৰে ৷
অনুৰাগীয়ে ৰাজহুৱাভাৱে প্ৰহাৰ কৰিলে এজন যুৱকক
হায়দৰাবাদৰ প্ৰসাদ আইমেক্সৰ বাহিৰৰ এটা ভিডিঅ’ সম্প্ৰতি ভাইৰেল হৈ পৰিছে ছ’চিয়েল মিডিয়াত ৷ ভাইৰেল হোৱা ভিডিঅ’টোত এজন ব্যক্তিয়ে প্ৰভাসৰ ছবিখনক সমালোচনা কৰি থকা দেখা পোৱা গৈছে ৷ যুৱকজনে ক’লে- "প্লে ষ্টেচন গেমৰ সকলো খলনায়কক এই ছবিখনত লোৱা হৈছে ৷ এই ছবিখনত হনুমান, বেকগ্ৰাউণ্ড স্কোৰ আৰু কিছুমান থ্ৰীডি শ্বটৰ বাহিৰে একোৱেই নাই ।"
প্ৰভাসৰ অভিনয়ৰ বিষয়ে সোধাত তেওঁ কয়- "এই অৱতাৰটো তেওঁৰ বাবে উপযুক্ত নাছিল । তেওঁ বাহুবলীত ৰজা আছিল । সেই ছবিখনত তেওঁক ৰজাঘৰীয়া দেখি তেওঁক এই ছবিখনত লোৱা হৈছিল । ওম ৰাউটে প্ৰভাসক ভালকৈ দেখুৱাই দিয়া নাছিল ।" এইখিনি কথা শেষ কৰাৰ লগে লগে যুৱকজনক তাত উপস্থিত থকা মানুহবোৰে ৰাজহুৱাভাৱে প্ৰহাৰ কৰে ৷
ব্যাপক সমালোচনাৰ সন্মুখীন হৈছে আদিপুৰুষ
ছবিখনৰ টিজাৰ মুক্তি পোৱাৰ পিছৰে পৰা ইয়াৰ ভিএফএক্সক সমালোচনা কৰা হৈছিল আৰু এতিয়া মুক্তিৰ পিচতো ছবিখনৰ ভিএফএক্স দৰ্শকে বৰ বিশেষ এটা ভাল পোৱা নাই ৷ কেৱল ভিএফএক্সেই নহয়, চৰিত্ৰবোৰৰ সাজ-পোছাক, আনকি তেওঁলোকৰ সংলাপকো সমালোচনা কৰিছে দৰ্শকে ।
এই ছবিখনে বিশ্বজুৰি ১৩০ কোটি টকাৰে বক্স অফিচত খাতা খুলিব বুলি আশা কৰা হৈছে। খবৰ অনুসৰি ছবিখন ৫০০ কোটি টকাত নিৰ্মাণ কৰা হৈছে ৷
এই ছবিখন পৰিচালনা কৰিছে ওম ৰাউটে । ছবিখনত হনুমানৰ চৰিত্ৰত অভিনয় কৰিছে অভিনেতা দেৱদত্ত নাগে আনহাতে অভিনেতা ছানী সিঙে ছবিখনত লক্ষ্মণৰ চৰিত্ৰত অভিনয় কৰিছে।
লগতে পঢ়ক: Adipurush: ছবিগৃহত ফুলেৰে সজাই তোলা হৈছে ভগৱান হনুমানৰ আসন, ছ’চিয়েল মিডিয়াত ভাইৰেল ফটো
