চিটাৰা ডেস্ক,14 জুন: বলীউডৰ প্ৰয়াত অভিনেতা সুশান্ত সিং ৰাজপুতৰ মৃত্যুৰ আজি তিনি বছৰ হ’ল । ২০২০ চনৰ ১৪ জুনত মুম্বাইৰ বান্দ্ৰাস্থিত নিজা ফ্লেটত চিপ লৈ থকা অৱস্থাত উদ্ধাৰ হৈছিল সুশান্তৰ মৃতদেহ ৷ সুশান্তৰ মৃত্যুৰ পিচতে সৃষ্টি হৈছিল নেপটিজম বিতৰ্ক ৷ যিয়ে নহওক আজি অভিনেতাগৰাকীৰ তৃতীয় মৃত্যু বাৰ্ষিকী উপলক্ষে তেওঁৰ অনুৰাগী, বন্ধু-বান্ধৱী আৰু পৰিয়ালৰ লোকে তেওঁক স্মৰণ কৰিছে ৷
সুশান্তৰ বিশেষ বন্ধু তথা চৰ্চিত প্ৰেয়সী ছাৰা আলী খানেও সুশান্তৰ মৃত্যু বাৰ্ষিকীত অভিনেতাগৰাকীৰ বাবে এটা পোষ্ট শ্বেয়াৰ কৰিছে ৷ পোষ্ট শ্বেয়াৰ কৰি অভিনেতাগৰাকী আজি য’তেই আছে তাতেই জিলিকি উঠক তাৰ বাবে প্ৰাৰ্থনা কৰে ।
পোষ্টটোত কি লিখিছে অভিনেত্ৰীগৰাকীয়ে
ছাৰাই নিজৰ ইনষ্টাগ্ৰাম একাউণ্টত দুখন ফটো শ্বেয়াৰ কৰিছে যিসমূহ ফটো অভিনেত্ৰীগৰাকীৰ প্ৰথম ছবি ‘কেদাৰনাথ’ৰ শ্বুটিঙৰ । এখন ফটোত ছাৰা আৰু সুশান্ত হেলিকপ্টাৰত বহি পিছলৈ চাই হাঁহি থকা দেখা গৈছে । দ্বিতীয়খন ফটোত দুয়োগৰাকীয়ে ছবিখনৰ চিত্ৰনাট্য পঢ়ি আছে ।
ফটোসমূহ শ্বেয়াৰ কৰি ছাৰাই এটা আৱেগিক কেপচনো লিখিছে। অভিনেত্ৰীগৰাকীয়ে লিখিছে, ‘আমাৰ প্ৰথম কেদাৰনাথ ভ্ৰমণত...আমাৰ প্ৰথম শ্বুটিঙৰ বাটত । মই জানো যে মোৰ আৰু কেতিয়াও এনেকুৱা অনুভৱ নহ’ব। কিন্তু মই জানো যে আপুনি একচন, কাট, সূৰ্যোদয়, নজী, চান্দনী ৰাত , কেদাৰনাথ আৰু আল্লাহৰ মাজত আছিল । তৰাবোৰৰ মাজত সদায় জিলিকি থাকা । কেদাৰনাথৰ পৰা এণ্ড্ৰমেডা লৈকে।’
উল্লেখ্য যে সুশান্তৰ মৃত্যুৰ পিচত বহু বিতৰ্ক সৃষ্টি হৈছিল । যেতিয়া মুম্বাই আৰক্ষীয়ে এই বিষয়টোৰ তদন্ত আৰম্ভ কৰিছিল তেতিয়া ইয়াৰ তাঁৰ NCB, ED, CBI লৈ গৈছিল । অভিনেতাগৰাকীৰ মৃত্যুৰ পিচত সেই সময়ত তেওঁৰ প্ৰেমিকা ৰিয়া চক্ৰৱৰ্তীকো বহুত ট্ৰল কৰা হৈছিল । কেৱল এয়াই নহয়, এই গোচৰত ৰিয়া আৰু তেওঁৰ ভাতৃ শৌভিক জেললৈ যাবলগীয়া হৈছিল । মনকৰিবলগীয়া বিষয় যে সুশান্তৰ মৃত্যু বাৰ্ষিকীত ৰিয়াও তেওঁৰ ইনষ্টাগ্ৰামত এটা পোষ্ট শ্বেয়াৰ কৰি তেওঁক স্মৰণ কৰিছে।
