তিনিচুকীয়া, 31 মাৰ্চ : উজনি অসমৰ বিভিন্ন ঠাইত দীৰ্ঘদিনৰ পৰা এটা দুষ্ট চক্ৰই চোৰাং ভাৱে তেল চুৰি কৰি আহিছে ৷ মাজে সময়ে আৰক্ষীয়ে অভিযান চলাই এই তেল চুৰি কাৰ্যৰ লগত জড়িত বহুলোকক আটক কৰিবলৈ সক্ষম হৈছে ৷ পিছে অতি পৰিতাপৰ কথা যে, আজি পৰ্যন্ত এই দুষ্ট চক্ৰটোৱে আৰক্ষীৰ চকুত ধুলি দি গোপনে অব্যাহত ৰাখিছে তেল চুৰি কাৰ্য ৷
শেহতীয়াকৈ তিনিচুকীয়াৰ মাকুম অঞ্চলৰ অন্তৰ্গত ডিমৰুহোলা গাঁৱৰ দাঁতিকাষৰীয়া লক্ষীপথাৰ বনাঞ্চলৰ পৰা আৰক্ষীয়ে অভিযান চলাই বৃহৎ পৰিমাণৰ চোৰাং কনডেন্স তেল জব্দ কৰে (Condensate oil seized in Tinsukia) ৷ এক গোপন সূত্ৰৰ ভিত্তিত বৃহস্পতিবাৰে অইল ইণ্ডিয়া লিমিটেডৰ নিৰাপত্তা বাহিনী, তিনিচুকীয়া আৰক্ষী, বৰডুবি আৰক্ষী আৰু লাংকাছী আৰক্ষীৰ এটা যৌথ দলে অভিযান চলাই লক্ষীপথাৰ বনাঞ্চলত মজুত কৰি ৰখা প্ৰায় 2700 শ লিটাৰ চোৰাং কনডেন্স তেল জব্দ কৰে ৷
লগতে অভিযানকাৰী দলটোৱে এখন নম্বৰ বিহীন মাৰুটি ভেন জব্দ কৰি ডিগবৈ আৰক্ষী থানাত গতাই দিয়ে ৷ ইতিমধ্যে ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে ৷ অচিৰেই ঘটনা সন্দৰ্ভত বহুকেইজন লোক আৰক্ষীৰ জালত পৰাৰ সম্ভাৱনা আছে বুলি আৰক্ষীয়ে জানিবলৈ দিছে ৷ এইসকল কোনোপধ্যেই যাতে হাৰি যাব নোৱাৰে, তাৰকাৰণে কঠোৰ ব্যৱস্থা গ্ৰহণ কৰিবলৈ প্ৰশাসনক সচেতন মহলে দাবী জনাইছে ৷
লগতে পঢ়ক : কৰিমগঞ্জত সতীৰ্থই জ্বলালে ছিদ্দিক আহমেদৰ প্ৰতিকৃতি
