কলিয়াবৰ, 30 মে’: বুধবাৰে সন্ধিয়া কলিয়াবৰৰ বৰালিগাঁৱৰ 37নং ৰাষ্ট্ৰীয় ঘাইপথত ভয়ংকৰ দুৰ্ঘটনা ৷ এখন দ্ৰুতবেগী ট্ৰাকে খুন্দিওৱাৰ ফলত থিতাতে নিহত হয় এগৰাকী মহিলা ৷ ঘটনা সংঘটিত কৰিয়েই পলায়ন কৰে ট্ৰাকখন ৷ নিহত মহিলাগৰাকী মানসিকভাৱে বিকাৰগ্ৰস্ত বুলি প্ৰকাশ কৰে স্থানীয় ৰাইজে ৷ লগতে কয় যে, বৰালিগাঁও অঞ্চলতে নিতৌ দেখা পোৱা যায় মহিলাগৰাকীক ৷
বৰালিগাঁৱৰ বালিবাটত ৰাস্তা পাৰ হ’বলৈ লওঁতেই মিছা দিশৰ পৰা কলিয়াবৰ তিনিআলি অভিমুখি এখন দ্ৰুতবেগী ট্ৰাকে মহিলা গৰাকীক খুন্দিয়াই থৈ যায় ৷ লগে লগে ঘটনাস্থলীত উপস্থিত হৈ কলিয়াবৰৰ মিছা আৰক্ষী চকীৰ ভাৰপ্ৰাপ্ত বিষয়া পূৰ্ণকুমাৰ নাথে মহিলাগৰাকীক জখলাবন্ধা চিকিৎসালয়লৈ প্ৰেৰণ কৰে যদিও চিকিৎসকে মৃত ঘোষণা কৰে ৷ ইফালে, এতিয়াও মহিলা গৰাকীৰ প্ৰকৃত পৰিচয় লাভ কৰা নাই আৰক্ষীয়ে ৷ সেয়ে, নিহত মহিলাগৰাকীৰ মৰণোত্তৰ পৰীক্ষাৰ অন্তত ৭২ ঘণ্টাৰ বাবে পৰিয়ালৰ লোকৰ বাবে মৃতদেহটো নগাঁও অসামৰিক চিকিৎসালয়ৰ মৰ্গত ৰখাৰ ব্যৱস্থা গ্ৰহণ কৰিব বুলিও প্ৰকাশ কৰে মিছা আৰক্ষীয়ে ।
