নগাঁও, 28 মাৰ্চঃভাৰতীয় ষ্টেট বেংকৰ কামপুৰ শাখাৰ অন্তৰ্গত ৰজাআলিৰ গ্ৰাহক সুৰক্ষা কেন্দ্ৰত জালিয়াতিৰে গ্ৰাহকৰ পৰা কৰ্মচাৰীয়ে ধন সংগ্ৰহ কৰি অহাৰ অভিযোগ উত্থাপন একাংশ গ্ৰাহকৰ ৷ দীৰ্ঘদিন ধৰি বিভিন্ন অভিযোগ উত্থাপন হৈ অহা কেন্দ্ৰটোৰ বিৰুদ্ধে শেহতীয়াকৈ এই অভিযোগ আনিছে একাংশ গ্ৰাহকে । অভিযোগ অনুসৰি, মাইনুল হকৰ নামত থকা সেৱা কেন্দ্ৰটোত একাংশ গ্ৰাহকে চৰকাৰী আঁচনিৰ ধন উলিয়াবলৈ গ'লে গ্ৰাহকসকলক তেওঁলোকৰ একাউণ্ট অচল হৈ থকা বুলি কোৱাৰ লগতে পুনৰ এটা একাউণ্ট খোলাৰ বাবে পৰাৰ্মশ দিয়ে কৰ্তৃপক্ষই ৷
ইপিনে গ্ৰাহকৰ নিজা আঙুলিৰ চাপেৰে নহয় মালিক মাইনুল হকৰ আঙুলিৰ চাপ দিলেহে তেওঁলোকৰ একাউণ্ট খোল খাই বুলি অভিযোগ গ্ৰাহকসকলৰ ৷ আনহাতে কৰ্তৃপক্ষৰ পৰামৰ্শ অনুসৰি গ্ৰাহকসকলে নতুনকৈ একাউণ্ট খুলে যদিও নতুন একাউণ্টত টকা দেখা নাপাই হতভম্ভ হৈ পৰে তেওঁলোক । এই বিষয়ত গ্ৰাহকসকলে কেন্দ্ৰটোৰ কৰ্তৃপক্ষৰ পৰা জানিব বিচাৰে যদিও কোনো সুফল নোপোৱাত কামপুৰ শাখাত গ্ৰাহকসকলে যোগাযোগ কৰে যদিও ইয়াতো কোনো সুফল নাপাই ক্ষুণ্ণ হৈ পৰে গ্ৰাহকসকল । উল্লেখ্য যে, ইয়াৰ পাচতে গ্ৰাহকসকলক ধন আদায় নোৱাৰি বিগত প্ৰায় দহ দিন ধৰি কেন্দ্ৰটো বন্ধ ৰাখি মাইনুল হকে পলায়ন কৰিছে বুলিও অভিযোগ তোলে গ্ৰাহকসকলে ৷