নিউজ ডেক্স , 30 ডিচেম্বৰ : ৰাজ্যত বৰ্তমানেও অব্যাহত আছে গৰুৰ চোৰাং সৰবৰাহ (Illegal Cattle smuggling in Assam)। বিভিন্ন সময়ত আৰক্ষীৰ অভিযানত গৰুৰ চোৰাংভাৱে চলাই অহা চিণ্ডিকেট চক্ৰৰ কাৰ্যকলাপ বিফল হোৱাৰ বাবে চক্ৰটোৱে নিতৌ ন ন কৌশল অৱলম্বন কৰা দেখা গৈছে । এইবাৰ গৰু সৰবৰাহৰ বাবে দুষ্টচক্ৰই ব্যৱহাৰ কৰিছে কণ্টেইনাৰ ।
বৃহস্পতিবাৰে কলিয়াবৰৰ 37 নং ঘাইপথেৰে অহা AS০১MC ৯৫৫১ নম্বৰৰ এখন বাহনত আৰক্ষীয়ে অভিযান চলাই জব্দ কৰে গৰুভৰ্তি কন্টেইনাৰ ৷ দেৰগাৱঁৰ পৰা ৩৭ নম্বৰ ঘাই পথেৰে যোৰাবাটৰ ন-মাইললৈ গৈ থকা অৱস্থাত জখলাবন্ধা আৰক্ষীয়ে গৰুভৰ্তি কন্টেইনাৰৰ বাহনখনৰ লগতে এজন সৰবৰাহকাৰীক আটক কৰে ৷ বাহনখনৰ চালকৰ ভাষ্য অনুসৰি চামগুৰি বৰমাৰ আনোৱাৰ হুছেইনৰ নেতৃত্বত চোৰাংভাৱে সৰবৰাহ কৰিছিল এই 33 টা গো-ধন ।
ইফালে বুধবাৰে নিশা হোজাই জিলাৰ লামডিং আৰক্ষীয়ে লামডিঙতো গৰুৰ চোৰাং সৰবৰাহৰ বিৰুদ্ধে অভিযান চলাই AS 09 AC 7131 নম্বৰৰ এখন বাহন জব্দ কৰে ৷ লগতে এই অভিযানত লামডিং আৰক্ষীয়ে 7 টাকৈ চোৰাং ভাৱে সৰবৰাহ কৰা গৰুসহ দুজন লোকক আটক কৰে ৷ লামডিঙৰ লালচৰাই অঞ্চলৰ পৰা নখুঁটিলৈ সৰবৰাহ কৰাৰ সময়তে আৰক্ষীয়ে জব্দ কৰে এই বাহনখন ৷
আটকাধীন সৰবৰাহকাৰী দুজনৰ নাম ক্ৰমে, লামডিঙৰ কৃষ্ণবস্তিৰ সঞ্জীৱ দাস আৰু বালুনালাৰ নটৱৰ দাস বুলি জানিব পৰা গৈছে ৷ গৰু সৰবৰাহকাৰী নটবৰ দাসৰ স্বীকাৰোক্তিৰ ভিত্তিত 6 টা ডমৰা গৰু আৰু এজনী গাই গৰু নখুঁটি বজাৰত বিক্ৰী কৰিবলৈ লৈ গৈছিল বুলি জনালে লামডিং থানাৰ আৰক্ষী বিষয়া চন কুমাৰ শৰ্মাই ৷
ৰাজ্যত ভিন্ন প্ৰান্তত গৰুৰ অবৈধ ছিণ্ডিকেট (Illegal Cow Syndicate)ৰ বিৰুদ্ধে অভিযান চলোৱাৰ সমান্তৰালকৈ গৰুৰ ছিণ্ডিকেটৰ বিৰুদ্ধে কামৰূপ আৰক্ষীয়ে চলাই আহিছে অভিযান ৷ শেহতীয়াকৈ চাংসাৰীতো জিলাখনৰ অতিৰিক্ত আৰক্ষী অধীক্ষক আছিফ আহমেদৰ নেতৃত্বত যোৱা আৰক্ষীৰ এটা দলে অভিযান চলাই AS 01 GC 2487 নম্বৰৰ এখন বাহন জব্দ কৰে ৷ গোপন সুত্ৰৰ ভিত্তিত অভিযান চলাই মদনপুৰৰ টোলগেটত জব্দ কৰা ট্ৰাকখনৰ পৰা চোৰাংকৈ সৰবৰাহ কৰা 24 টা গৰু উদ্ধাৰ কৰে আৰক্ষীৰ দলটোৱে ৷ উদ্ধাৰ কৰা গৰুকেইটা তেজপুৰ বালিপাৰাৰ পৰা মেঘালয়লৈ লৈ গৈ থকা হৈছিল ৷ ইতিমধ্যে গৰু চুৰি চক্ৰটোৰ সন্দৰ্ভত আৰক্ষীয়ে তদন্ত অব্যাহত ৰাখিছে ।
লগতে পঢ়ক : Two BJP MLAs have withdrawn PSO : বিজেপিৰ দুই বিধায়কে প্ৰত্যাহাৰ কৰিছে নিজৰ PSO
