গুৱাহাটী, 28 নৱেম্বৰ : গুৱাহাটীত পানী যোগানৰ ঠিকাৰ নামত কমিছন সংগ্ৰহৰ অভিযোগ । 80 কোটিৰ ঠিকাৰ বিপৰীতে 10% কমিছন । জল আয়োগৰ পৰিচালন সঞ্চালকৰ কাৰ্যালয়ত বহিয়েই কমিছনৰ দৰদাম বহিৰাগত দালাল পিতা-পুত্ৰ ৰাজকুমাৰ খাকলিয়া আৰু ৰাঘৱ খাকলিয়াৰ । সমগ্ৰ ঘটনাৰ আঁৰত আছে গুৱাহাটী উন্নয়ন বিভাগৰ মন্ত্ৰী অশোক সিংঘাল (Minister Ashok Singhal name has been raised in corruption) ৷ এই অভিযোগ সংগ্ৰামী কৃষক শ্ৰমিক সংঘ অসমৰ ।
গুৱাহাটী প্ৰেছ ক্লাৱত শনিবাৰে এক সংবাদমেল সম্বোধন কৰি সংঘৰ সাধাৰণ সম্পাদক দীনেশ দাসে উত্থাপন কৰে এই অভিযোগ ৷ দাসে সংবাদমেলত সদৰি কৰা অনুসৰি বৃহত্তৰ গুৱাহাটীত খোৱাপানী যোগান(Guwahati water supply project)ৰ বাবে সৰ্বমুঠ চাৰিটা প্ৰকল্পৰ কাম আৰম্ভ কৰা হৈছিল যদিও আজিলৈ সম্পূৰ্ণ নহ’ল এই প্ৰকল্পৰ কাম । গুৱাহাটী উন্নয়ন বিভাগৰ মন্ত্ৰী অশোক সিংঘালে গুৱাহাটীবাসীৰ জনস্বাস্থ্যৰ অধিকাৰৰ পানীটুপি যোগানৰ বাবে তৎপৰতা দেখুওৱাৰ পৰিৱৰ্তে আঁচনিখন ধোৱাচাঙত পৰিণত কৰাৰহে ষড়যন্ত্ৰত লিপ্ত হৈছে ।
তেওঁ লগতে কয় যে, বিভাগীয় মন্ত্ৰীৰ অধীনস্থ জল ব’ৰ্ডৰ পৰিচালন সঞ্চালক সম্পটে নিজ কাৰ্যালয়ত ৰাজকুমাৰ খাকলিয়া আৰু ৰাঘৱ খাকলিয়া নামৰ দুই দালালৰ হতুৱাই থলুৱা ঠিকাদাৰৰ পৰা 10% কমিছন দাবী কৰিছে তাৰ ভিডিঅ’ আছে । সংগ্ৰামী কৃষক শ্ৰমিক সংঘই গুৱাহাটী উন্নয়ন বিভাগৰ মন্ত্ৰী অশোক সিংহলক মন্ত্ৰীত্বৰ পৰা অপসাৰণৰ দাবী জনায় ৷
তেওঁলোকে লগতে পৰিচালন সঞ্চালক সম্পট আৰু দুই দালাল ৰাজকুমাৰ খাকলিয়া আৰু ৰাঘৱ খাকলিয়াক অতি শীঘ্ৰে গ্ৰেপ্তাৰ কৰাৰ বাবে দাবী জনায় । ইয়াৰ লগতে মহানগৰবাসীক অতি শীঘ্ৰে পানী যোগান ধৰিবলৈ চৰকাৰক আহ্বান জনায় সংঘই । সংগ্ৰামী কৃষক শ্ৰমিক সংঘই অন্যথা ৰাইজৰ লগত লগ হৈ চৰকাৰৰ এই কেলেংকাৰীৰ বিৰুদ্ধে ব্যাপক প্ৰতিবাদ সাব্যস্ত কৰাৰ হুংকাৰ দিয়ে ।
লগতে পঢ়ক : জলজীৱন মিছন : প্রতিদিনে খৰচ হোৱা পানীৰ হিচাব ল’ব ৰণজিৎ কুমাৰ দাসে
