মৰাণ, ২৩, অক্টোবৰঃ কৰ'ণা মহামাৰীৰ কাৰণে ডিব্ৰুগড় জিলা মৰাণৰ সাহিত্য চৰ্চাৰ এক অন্যতম অনুষ্ঠান জোনাকী মেলৰ বৈঠক কেইবামাহো ধৰি বন্ধ হৈ থকাৰ পাছত বৃহস্পতিবাৰে নিশা ১৭৩ সংখ্যক এখন বৈঠক অনুষ্ঠিত হয় । মৰাণৰ উষাপুৰ নিবাসী দেবেন বৰগোহাঁই আৰু সাহিত্যিক ইলা বৰগোহাঁইৰ আতিথ্যত উক্ত বৈঠক খন অনুষ্ঠিত হয় ।
বিশিষ্ট সাহিত্যিক তথা মৰাণ মহাবিদ্যালয়ৰ প্ৰাক্তন অধ্যক্ষ ড0 অনিল শইকীয়াই সভাপতিত্বত কৰা বৈঠক খনৰ উদ্দেশ্য ব্যাখ্যা কৰে জোনাকী মেলৰ মুখ্য উদ্যোক্তা বাছা বৰাই । লগতে বৈঠক খনত বিশিষ্ট সাহিত্যিক ইলা বৰগোহাঁইৰ সদ্য প্ৰকাশিত উপন্যাস " হে মহানগৰ হে মহাসাগৰ " আৰু ভ্ৰমণ কাহিনী "সাতোখন সুৰীয়া নৈ " নামৰ গ্ৰন্থ দুখনৰ শুভ উন্মোচন কৰে ।
ইফালে মাংগলিক উৰুলি ধ্বনি দি গ্ৰন্থ দুখন উন্মোচন কৰে বিশিষ্টা সাহিত্যিক ডাঃ লোহিত কুমাৰ বৰা আৰু বাল্য বিকাশ বিদ্যালয়ৰ প্ৰধান শিক্ষক ড0 স্বপন কুমাৰ চুতীয়াই । উন্মোচকদ্বয়ৰ উপৰিও শিক্ষক নবীন হাজৰিকাই গ্ৰন্থ দুখনৰ বিষয় বস্তুৰ লগতে সাহিত্যিক বৰগোহাঁইৰ কৰ্মময় জীৱন সম্পৰ্কে বক্তব্য আগবঢ়াই । উক্ত সভাত অঞ্চলটোৰ কেইবাজনো সাহিত্যক,সাংবাদিক,বিশিষ্ট ব্যক্তি উপস্থিত থাকে।
লগতে পঢ়ক- তেজপুৰ বৈদ্যুতিক চক্ৰৰ গ্ৰাহকৰ বাবে ভাল খবৰ
