নিউজ ডেস্ক, 6 অক্টোবৰ: অহা সপ্তাহত তেলেংগানাত কংগ্ৰেছ দলে ঐক্য বাছ যাত্ৰা আৰম্ভ কৰিব ৷ এই বাছ যাত্ৰাত ১১৯ টা বিধানসভা সমষ্টিৰ দলৰ শীৰ্ষ নেতাসকলক জড়িত কৰা হ’ব । ‘‘হয়, আমি ৰাহুল গান্ধীক অহা সপ্তাহৰ বাবে নিমন্ত্ৰণ জনাইছোঁ । তাৰিখ ঠিৰাং কৰাৰ বাবে সকলো কাম চলি আছে । আমি সকলো শীৰ্ষ নেতাক আমন্ত্ৰণ কৰিম ।’’ ইটিভি ভাৰতক এইদৰে কয় তেলেংগানাৰ AICCৰ প্ৰভাৰী মণিকৰাও ঠাকৰেয়ে ।
দলৰ অন্তৰ্দৃষ্টিসম্পন্ন লোকৰ মতে, ৰাজ্যিক পৰ্যায়ত দলৰ ঐক্য বৃদ্ধি কৰাৰ লক্ষ্যৰে ৰাহুল গান্ধীয়ে এই বাছ যাত্ৰা আৰম্ভ কৰিব ৷ দলৰ সভাপতি মল্লিকাৰ্জুন খাৰ্গে, প্ৰিয়ংকা গান্ধী ৱাদ্ৰাৰ লগতে দলৰ অন্যান্য শীৰ্ষ কৰ্ম-কৰ্তা, চাৰিওজন মুখ্যমন্ত্ৰী, জয়ৰাম ৰমেশ আৰু দিগ্বিজয় সিঙৰ দৰে জ্যেষ্ঠ বিভিন্ন সমষ্টিত এই সমদলত যোগদান কৰি শক্তি প্ৰদৰ্শন কৰিব ।
১৫ বা ১৬ অক্টোবৰৰ পৰা বাছ যাত্ৰা আৰম্ভ হোৱাৰ সম্ভাৱনা আছে আৰু এমাহৰ ভিতৰতে ১১৯খন বিধানসভাৰ আসনৰ আটাইকেইখন সামৰি ল’ব বুলি জানিব পৰা গৈছে । ৭ অক্টোবৰত হায়দৰাবাদত ৰাজ্যিক ইউনিটৰ এখন বৈঠক অনুষ্ঠিত কৰি পৰিকল্পনাৰ তাৰিখ আৰু সবিশেষ নিৰ্ণয় কৰা হ’ব বুলি দলীয় সূত্ৰই জনায় । এই বাছ যাত্ৰাই কংগ্ৰেছৰ বাবে শাসকীয় বি আৰ এছৰ লগতে বিজেপিকো লক্ষ্য কৰি লোৱাৰ আন এক সুযোগ প্ৰদান কৰিব । শেহতীয়াকৈ ৰাহুল গান্ধীয়ে বি আৰ এছ আৰু বিজেপিক হেণ্ড ইন গ্ল’ভ বুলি সমালোচনা কৰি পি এম মোদীৰ বক্তব্যৰ উদ্ধৃতি দি বি আৰ এছৰ মুৰব্বী তথা তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৱে পূৰ্বেই এন ডি এত যোগদান কৰিব বিচাৰিছিল বুলি কয় ।
‘‘সেই কাৰণেই ৰাহুল গান্ধীয়ে বি আৰ এছে বিৰোধী মিত্ৰজোঁট INDIA ত যোগদান কৰাৰ বিষয়ত স্পষ্টকৈ না কৰিছিল । তেওঁ সদায় বি আৰ এছৰ সৈতে হাত মিলোৱাৰ বিৰোধিতা কৰি আহিছে ।’’ এইদৰে কয় AICC ৰ এগৰাকী জ্যেষ্ঠ কৰ্মীয়ে । ৰাহুল গান্ধীৰ বিশাল সমাবেশৰ পিচত আৰম্ভ হ’বলগীয়া বাছ যাত্ৰাত সৰ্বাধিক সমৰ্থন লাভৰ বাবে হেভিৱেট নেতাসকলক জড়িত কৰাৰ পৰিকল্পনা হৈছে ।
সেই অনুসৰি প্ৰিয়ংকা গান্ধী, মল্লিকাৰ্জুন খাৰ্গে কৰ্ণাটকৰ মুখ্যমন্ত্ৰী কে সিদ্ধাৰমাইয়া, উপ-মুখ্যমন্ত্ৰী ডি কে শিৱ কুমাৰ, ছত্তীশগড়ৰ মুখ্যমন্ত্ৰী ভূপেশ বাঘেল, ৰাজস্থানৰ মুখ্যমন্ত্ৰী অশোক গেহলট আৰু হিমাচল প্ৰদেশৰ মুখ্যমন্ত্ৰী সুখৱিন্দৰ চুখুৰ অংশগ্ৰহণৰ সুবিধা অনুসৰি তাৰিখ নিৰ্ধাৰণ কৰা হ’ব ।
ইয়াৰ উপৰিও দিগ্বিজয় সিং আৰু জয়ৰাম ৰমেশৰ দৰে জ্যেষ্ঠ নেতায়ো যোগদান কৰিব পাৰে বুলি দলীয় সূত্ৰই জানিবলৈ দিয়ে । এই নেতাসকলে বিশেষ স্থানত বাছ যাত্ৰাত যোগদান কৰি প্ৰদেশ কংগ্ৰেছৰ নেতাসকলক সংগ দিব । ‘‘প্ৰিয়ংকা গান্ধীয়ে নৱৰাত্ৰিৰ সময়ত ৰাজ্য ভ্ৰমণ কৰিব লাগিব আৰু বাথুকম্মা উদযাপনত অংশগ্ৰহণ কৰিব লাগিব । ইয়াৰ ফলত ৰাজ্যৰ কংগ্ৰেছ, বিশেষকৈ মহিলা ভোটাৰক অনুপ্ৰেৰণা যোগাব পৰা যাব ।’’ ৰেভাণ্ট ৰেড্ডীয়ে কয় ।
প্ৰিয়ংকা গান্ধীয়ে চলিত মাহৰ শেষৰ ফালে বা নৱেম্বৰৰ প্ৰথম সপ্তাহৰ ভিতৰত তেলেংগানা ভ্ৰমণ কৰি মহিলাৰ চনদ অনুষ্ঠিত কৰাৰ লগতে নিজামাবাদত এক সমাৱেশত ভাষণ দিয়াৰ সম্ভাৱনা আছে বুলি দলীয় সূত্ৰই জনায় । কৰ্ণাটকত দলটোৱে চলোৱা একেধৰণৰ অভিযানৰ আৰ্হিত এই যাত্ৰাৰ আৰ্হি নিৰ্মাণ কৰা হৈছে যাতে দুয়োগৰাকী প্ৰতাপী নেতা কে সিদ্ধাৰমাইয়া আৰু ডি কে শিৱ কুমাৰৰ মাজত ঐক্য বৃদ্ধি কৰিব পৰা হয় । তেলেংগানাত কংগ্ৰেছ সমদলৰ নেতৃত্বত আছে ৰাজ্যিক ইউনিটৰ মুৰব্বী ৰেভান্ট ৰেড্ডী আৰু চিএলপি নেতা ভট্টী বিক্ৰমাৰ্কাই, যিয়ে বিগত সপ্তাহত বিআৰএছ আৰু বিজেপিৰ বহু নেতাক দলত অন্তৰ্ভুক্ত কৰিছে ।
শুকুৰবাৰে খাৰ্গেৰ উপস্থিতিত কংগ্ৰেছত যোগদান কৰে বি আৰ এছৰ নেতা কাছিৰেদ্দি নাৰায়ণ ৰেড্ডী আৰু ঠাকুৰ বালাজী সিঙে । যিহেতু নিৰ্বাচন আয়োগে নিৰ্বাচনৰ তাৰিখ ঘোষণা কৰাৰ কিছুদিন পিছতে যাত্ৰা আৰম্ভ হ’ব, সেয়েহে একাংশ দলৰ নেতাই আঙুলিয়াই দিয়ে যে যাত্ৰাৰ খৰচ বহন কৰাটো এটা ইছ্যু হ’ব পাৰে । “সেইটো কোনো সমস্যা নহ’ব । যাত্ৰা চলি থাকিব । যিয়ে যোগদান কৰিব বিচাৰিব তেওঁ এটা বিশেষ সমষ্টিত যোগদান কৰিব ।’’ এইদৰে কয় AICC ৰ কাৰ্যকৰ্তাগৰাকীয়ে ।
