নেশ্যনেল ডেস্ক,২৮ জুলাই : লুধিয়ানাৰ গিয়াচপুৰাত গেছ নিৰ্গমনকলৈ আতংকময় পৰিৱেশে বিৰাজ কৰে । এগৰাকী গৰ্ভৱতী মহিলা অচেতন হৈ পৰাৰ পাছতে অঞ্চলটোত তীব্ৰ উত্তেজনা । ঘটনাক লৈ প্ৰশাসনে অনুসন্ধান অব্যাহত ৰাখিছে ।
জানিব পৰা মতে, শুকুৰবাৰে পুৱাই গিয়াচপুৰা অঞ্চলত এগৰাকী গৰ্ভৱতী মহিলা অচেতন হৈ পৰে । লগে লগে অঞ্চলটোত আতংকৰ সৃষ্টি হয় । মহিলাগৰাকীক লগে লগে ওচৰৰ চিকিৎসালয়ত ভৰ্তি কৰোৱা হয় । মহিলাগৰাকী অচেতন হৈ পৰি যোৱাৰ লগে লগে অঞ্চলটোত গেছ নিৰ্গমন হোৱাৰ খবৰ ওলাইছিল । গেছ নিৰ্গমন হোৱাৰ খবৰ পোহৰলৈ অহাৰ পাচতে মানুহৰ মাজত তীব্ৰ আতংকৰ সৃষ্টি হৈছিল । পাছত এনডিআৰএফৰ দল ঘটনাস্থলীত উপস্থিত হয় । প্ৰশাসনৰ লোকসকলো ঘটনাস্থলীত উপস্থিত হৈ অনুসন্ধান আৰম্ভ কৰে । অঞ্চলটো সঠিকভাৱে পৰীক্ষণ কৰা হয় যদিও কোনো গেছ নিৰ্গমন হোৱা নাই বুলি স্পষ্ট কৰি দিয়ে মহকুমা দণ্ডাধীশে ।
দণ্ডাধীশে উল্লেখ কৰা মতে, মহিলাগৰাকী যিহেতু ৪ মাহৰ গৰ্ভৱতী, সেয়ে তেওঁ কিছু দুৰ্বল হৈ আছিল । কেতিয়াবা গৰ্ভৱতী মহিলাৰ মূৰ ঘূৰাই বা বমি হয় । তেওঁ উল্লেখ কৰা মতে মানুহে আতংকিত হোৱাৰ প্ৰয়োজন নাই । প্ৰশাসনৰ লোকসকলে অনুসন্ধান অব্যাহত ৰাখিছে ।
অৱশ্যে অঞ্চলটোৰ লোকসকলে আৰক্ষী আৰু বিধায়ক ৰজিন্দৰপাল কৌৰ ছিনাৰ সৈতে যোগাযোগ কৰিছে । বিধায়ক ছিনাৰ মতে গেছ নিৰ্গমন হোৱাৰ কোনো ঘটনা সংঘটিত হোৱা নাই । কিন্তু সাৱধানতা হিচাপে স্থানীয় আৰক্ষী আৰু অসামৰিক চিকিৎসালয়ক অৱগত কৰা হৈছে । বিধায়কগৰাকীৰ মতে জিলা আৰক্ষী প্ৰশাসনে বিষয়টো তদন্ত কৰি আছে । জানিব পৰা মতে অঞ্চলটো বন্ধ কৰি থোৱা হৈছে । পৌৰ নিগমৰ দলবোৰেও নলা-নৰ্দমাবোৰ পৰীক্ষা কৰি আছে ।
লক্ষণীয়ভাৱে যাতে ঘটনাটোক লৈ আতংক বৃদ্ধি নাপায় বা অপ্ৰীতিকৰ পৰিৱেশৰ সৃষ্টি নহয় তাৰ বাবে প্ৰশাসনে চোকা দৃষ্টি ৰাখিছে । ইফালে এই ঘটনাৰ কিছু দিন আগত অৰ্থাৎ যোৱা এপ্ৰিল মাহত লুধিয়ানাত গেছ নিৰ্গমন হোৱাৰ ফলত ১১ গৰাকী লোকৰ মৃত্যু হৈছিল । যাৰ বাবে ঘটনাটোকলৈ অঞ্চলটোত যথেষ্ট প্ৰতিবাদ হৈছিল । অৱশ্যে, ইয়াৰ অনুসন্ধানৰ প্ৰতিবেদনত কোনো লোকক দোষী সাব্যস্ত কৰা হোৱা নাছিল ।
লগতে পঢ়ক : Hyderabad depressed woman in Chicago : অনাহাৰে ছিকাগোৰ পথত হায়দৰাবাদৰ হতাশাগ্ৰস্ত যুৱতী
