ক’ভিড 19 সন্দৰ্ভত সৰ্বদলীয় বৈঠকত মিলিত প্ৰধানমন্ত্ৰী মোদী

দেশৰ ক’ভিড 19 সংক্ৰান্তীয় পৰিস্থিতি সন্দৰ্ভত আলোচনা কৰাৰ বাবে বিভিন্ন দলৰ নেতা আৰু কেন্দ্ৰীয় মন্ত্ৰীসকলৰ সৈতে বৈঠকত মিলিত হয় প্ৰধানমন্ত্ৰী নৰেন্দ্ৰ মোদী ৷ এই বৈঠকত বিৰোধী নেতাসকলে চৰকাৰক ক’ভিড 19 ভেকচিনৰ কেতিয়াৰ পৰা উপলব্ধ হ’ব আৰু ইয়াক কি পৰ্যায়ত বিতৰণৰ ব্যৱস্থা কৰা হ’ব এই সন্দৰ্ভত প্ৰশ্ন কৰে ৷

নেশ্যনেল ডেস্ক,4 ডিচেম্বৰঃ দেশৰ ক’ভিড 19 সংক্ৰান্তীয় পৰিস্থিতি সন্দৰ্ভত আলোচনা কৰাৰ বাবে বিভিন্ন দলৰ নেতা আৰু কেন্দ্ৰীয় মন্ত্ৰীসকলৰ সৈতে শুকুৰবাৰে এক বৈঠকত মিলিত হয় প্ৰধানমন্ত্ৰী নৰেন্দ্ৰ মোদী ৷ লোকসভা আৰু ৰাজ্যসভাৰ সদস্যসকলো এই ভাৰ্চুৱেল বৈঠকখনিত উপস্থিত থাকে ৷ সূত্ৰই প্ৰকাশ কৰা অনুসৰি পাঁচ বা তাতকৈ অধিক সাংসদ থকা ৰাজনৈতিক দলসমূহে এই বৈঠকত ভাষণ প্ৰদান কৰে ৷

উল্লেখ্য যে, এই বৈঠকত ৰাজ্যসভাৰ বিৰোধী দল কংগ্ৰেছৰ হৈ ভাষণ প্ৰদান কৰে গুলাম নৱী আজাদে ৷ সমান্তৰালকৈ, তৃণমূল কংগ্ৰেছৰ হৈ সুদ্বীপ বন্দোপধ্যায়, এন চি পিৰ হৈ শৰদ পৱাৰ, টি আৰ এছৰ হৈ নামা নাগেশ্বৰ আৰু শিৱ সেনাৰ হৈ বিনায়ক ৰাৱাটে ভাষণ প্ৰদান কৰে ৷

এই বৈঠকত বিৰোধী নেতাসকলে চৰকাৰক ক’ভিড 19 ভেকচিনৰ কেতিয়াৰ পৰা উপলব্ধ হ’ব আৰু ইয়াক কি পৰ্যায়ত বিতৰণৰ ব্যৱস্থা কৰা হ’ব এই সন্দৰ্ভত প্ৰশ্ন কৰে ৷ কৰ’ণা মহামাৰীৰ আৰম্ভ হোৱাৰে পৰা এইখন দ্বিতীয় সৰ্বদলীয় বৈঠক অনুষ্ঠিত কৰা হয় ৷

এই বৈঠকত উপস্থিত থাকে কেন্দ্ৰীয় প্ৰতিৰক্ষা মন্ত্ৰী ৰাজনাথ সিং, গৃহমন্ত্ৰী অমিত শ্বাহ, স্বাস্থ্যমন্ত্ৰী হৰ্ষবৰ্ধন, সংসদীয় পৰিক্ৰমা মন্ত্ৰী প্ৰহ্লাদ জোশী, সংসদীয় পৰিক্ৰমাৰ ৰাজ্যিক মন্ত্ৰী ভি মুৰুলীধৰণ ৷ এই বৈঠকখন কেন্দ্ৰীয় স্বাস্থ্য সচিব ৰাজেশ ভূষণৰ এটি উপস্থাপনাৰ দ্বাৰা আৰম্ভ কৰা হয় য’ত দেশত বৰ্তমানলৈ ক’ভিড 19ৰ বিৰুদ্ধে গ্ৰহণ কৰা সকলোধৰণৰ ব্যৱস্থাৰ বিষয়ে বিতংকৈ দাঙি ধৰা হৈছে ৷

লগতে পঢ়ক-জম্মু-কাশ্মীৰত DDC নিৰ্বাচনৰ প্ৰাৰ্থীলৈ দুৰ্বৃত্তৰ গুলীচালনা