নেশ্বনেল ডেক্স, 28 ফেব্ৰুৱাৰীঃ উত্তৰপ্ৰদেশৰ এগৰাকী কৰিকৰী প্ৰশিক্ষক শ্যাম চৌৰাচিয়াৰ প্ৰচেষ্টাত এতিয়া কাণফুলি কেৱল মহিলাৰ সৌন্দৰ্য বৰ্ধনৰ আহিলা অথবা অলংকাৰ হৈ থকা নাই ৷ শ্যাম চৌৰাচিয়াই প্ৰস্তুত কৰা কাণফুলিয়ে যিকোনো অনাকাংক্ষিত পৰিস্থিতিৰ পৰা ৰক্ষা কৰিব যুৱতী আৰু মহিলাক ৷
ম'বাইল ফোনৰ লগত ব্লুটুথৰ জৰিয়তে সংযোগ হৈ থকা এই বিশেষ কণফুলিৰ জৰিয়তে বিপদৰ উমান পালে 112 নম্বৰ ডায়েল কৰি যোগাযোগ কৰিব পাৰিব আৰক্ষীৰ সৈতে ৷ যিকোনো বিপদজনক পৰিস্থিতিত কাণফুলিপাতত থকা এটা বুটাম টিপিলেই স্বয়ংক্ৰিয়ভাৱে ম'বাইল ফোনৰ পৰা ডাইল হ'ব 112 নম্বৰ ৷ ইয়াৰ জৰিয়তে ওচৰত থকা আৰক্ষী নিয়ন্ত্ৰণ কক্ষই আপোনা আপুনি সেই মহিলা অথবা যুৱতীগৰাকীৰ LOCATION নিৰ্ণয় কৰিব পাৰিব ৷
ইমানেই নহয়, বেটাৰীৰে সংযোগ থকা এই কাণফুলিৰ জৰিয়তে প্ৰয়োজনত 1 কিল'মিটাৰ ব্যৱধান পৰ্যন্ত শুনিবলৈ পোৱকৈ ডাঙৰ শব্দও কৰিব পৰি ৷ যাৰ জৰিয়তে ওচৰে-পাজৰে থকা লোকসকলে শব্দটোক অনুসৰণ কৰি উক্ত স্থানত উপস্থিত হ'ব পাৰিব ৷
উল্লেখ্য যে, ইয়াৰ পূৰ্ৱেও কৰিকৰী প্ৰশিক্ষক শ্যাম চৌৰাচিয়াই মহিলাৰ সুৰক্ষাৰ প্ৰতি লক্ষ্য ৰাখি গুলী ফুটাব পৰা লিপষ্টিক আৰু ইলেকট্ৰিক চক দিব পৰা মহিলাৰ হেণ্ডবেগ উদ্ভাৱন কৰিছিল ৷ ইতিমধ্যে শ্যাম চৌৰাচিৰয়াৰ এই উদ্ভাৱন সমূহৰ বাবে স্থানীয় শিক্ষাৰ্থী তথা চাকৰি কৰা মহিলা সকলে তেখেতক যথেষ্ট প্ৰশংসা কৰিছে ৷
